企上歐聯舞台例走樣曼城好難贏「玻」

猪拉多纳

22/11/2011
文： 亨格比利

歐聯分組賽今晚戰火重燃，焦點係A組拿玻里火併曼城。亨格比利本身係曼城躉，但絕對唔會畀感情影響理智，呢支英超新貴喺聯賽無錯係所向披靡，不過去到歐聯大舞台始終欠缺咗份霸氣，反觀主場表現硬淨嘅拿玻里受讓仲抵捧，今戰小弟決定做猶大，博1.77倍「讓主」。（有線64及204、中央5台周三凌晨3:45直播）




億萬大軍曼城係英超唯一不敗之師，12輪聯賽喪入42球，剛啱亦打破埋紐卡素嘅不敗金身，身為擁躉嘅亨格比利固然高興。亦因為對曼城有透徹了解，小弟發現佢哋喺歐洲戰場同聯賽判若兩隊，最近兩輪分組賽砌低態沉兼殘陣嘅維拉利爾係應分，但主場對住拿玻里捱打、作客畀拜仁技術性擊倒，都足以反映曼城喺歐聯戰場未成氣候。


曼城主場交手都捱打


目前喺A組以7分位列次席嘅曼城，今晚贏波即可躋身16強，揸住5分緊隨其後嘅拿玻里為出線亦非勝不可。呢支那不勒斯球隊喺A組4輪分組賽只曾一敗，仲要係作客拜仁僅輸2:3，表現有晒交代。最重要係拿玻里自2008年重返歐洲戰場之後，10場歐戰主場全部保持不敗，強如拜仁去到聖保羅球場都要失分，絕對唔係好恰。


拿玻里典型歐戰地頭龍


拿玻里中場辛尼加要坐波監，預計加根奴或迪斯馬利會頂佢個位，不過拿玻里嘅致勝武器始終係鋒線，由咸錫、拿維斯同卡雲尼合組嘅攻擊鐵三角速度與技術兼備，主場出擊莫講話保不敗，劏埋曼城都仲得。