保亞斯撐費托仲值6億

猪拉多纳

20/11/2011


車路士領隊保亞斯力撐愛將，話就算畀佢依家再次選擇，都會用5,000萬鎊（約6億港元）收購費蘭度托利斯，目的顯而易見，就係希望費托爭氣再展頂級射手雄風。而另一名前紅軍球員魯爾梅利斯，話好尊重利物浦球迷，今晚就算入波都唔會慶祝。




費托目前僅為車路士入過五球，平均一個入球值1,000萬鎊，但保帥仍對佢寄予厚望，而唯一幫到佢嘅方法就係出言力撐佢：「你問我會唔會花5,000萬鎊買費托？我當然會。前鋒淨係識入波唔掂，費托落場時除攻門外，仲為隊友作出好多助攻，所以整體上我滿意佢表現。佢愈來愈弗，好快就重拾射門鞋。」


魯爾梅利斯入波唔慶祝


魯爾梅利斯表示就算入波都唔慶祝：「我好多謝利物浦帶我到英超，紅軍球迷亦好支持我，所以如果我今晚入波都會保持沉默。」另外佢話有辦法嘜死蘇亞雷斯，並已將方法話畀後防隊友知，但係乜辦法就冇透露。