甲組會追思一起贖身的日子

猪拉多纳

12/11/2011
文： 波男

近期興懷舊，呢股風氣亦吹到香港球圈，甲組會人士齊齊回味前幾年「我們一起贖身的日子」，原來佢哋不滿現時甲組賽事行政費過高，希望波總高抬貴手喎！




最近十年本地波其中一個常用關鍵詞就係「贖身」，由於入場人數太少，票房不足以支付場租抽佣及行政費，球會班主就要掏腰包找數，千萬大軍當然頂得住，不過細球會雞尾班就覺得好攞命，希望諗辦法解決。


場地人手彈性處理


有甲組會人士投訴，現時喺深水埗或九龍灣一場港甲賽事，最平都要九千幾蚊，即係要一百五十人購票入場先至平手，不過大家都好明白有時戲碼唔吸引，少過一百觀眾都時有發生，有球會人士認為，既然冇人睇波，波總係咪應該彈性處理，請少幾個臨時工，幫輕吓球會？




最近旺角場重開，據講最低消費超過四萬蚊！其中一個原因係波總加派大量人手駐場，有甲組會人士指：「一場波請成六十幾人開工，梗係貴啦！係咪場場波都需要咁多人手先？」本地波邊啲戲碼有幾多人入場，其實大家心照，如果海軍鬥水兵都請幾十人，收人哋四皮幾嘢，咁就唔合理喇。




至於講到回味往事，皆因前幾年波總球會同舟共濟，編排賽事好彈性，將啲戲碼弱嘅波搞「雙料娛樂」，令細球會雞尾班都有得生存，如果唔係？港甲早就摺埋啦！