祖記情義大過天

猪拉多纳

25/10/2011
文： 巨高

意甲本周中開快車，率先上場係祖雲達斯主場對費倫天拿。上輪聯賽祖雲達斯又喺主場和波失分，積分榜排名亦畀烏甸尼斯及拉素趕過，為保住競爭地位，祖雲達斯今場一定要贏波，更加重要係，今晚祖雲達斯要向剛於周日在MotoGP比賽中意外身亡嘅意大利電車手西蒙仙尼獻上勝利，祝佢一路走好！呢類「帛金波」可謂情義大過天，「讓球主勝」可留意。（now633 周三凌晨２時45分直播）




當MotoGP大會正式公布西蒙仙尼死訊之後，祖雲達斯官方網頁已即時發放新條目，悼念呢位亦係祖記球迷嘅意大利天才車手。至於隊長迪比亞路、基亞連尼等球員亦向媒體及社交網站發言，為呢位英雄送上最後祝福。今場祖雲達斯球員將會臂纏黑紗，並於賽前進行默哀儀式，期間場內大螢幕會播放西蒙仙尼生前片段。




另一方面，祖雲達斯宣布今場比賽已經全場爆滿，消息對球隊爭勝亦有多少幫助。祖雲達斯最近一次「爆棚」係本月初主場鬥ＡＣ米蘭，當日祖雲達斯贏二比○。


費倫天拿殘陣士氣差


費倫天拿上輪聯賽喺主場與卡坦尼亞打和二比二，賽後球迷狂噓教練米赫洛域，呢位塞爾維亞教頭突然大發脾氣，話球迷唔鍾意的話佢可以隨時執包袱。睇嚟米帥已無心戀戰，費倫天拿隨時一沉不起。今場蒙杜利禾停賽、右閘卡辛尼及中堅高特立又有傷，陣容不整之下更難睇好。