白禮頓硬淨唔怕錘仔幫

猪拉多纳

24/10/2011
文： 走肖

白禮頓今晚喺英冠主場招呼韋斯咸，其實係上季英甲冠軍對英超榜尾牙骹戰，話題性唔差。雖然白禮頓最近氣勢轉弱，但領隊普耶肯諗計，成功借用西布朗中堅干沙路查拉，代替重傷嘅隊長湯美艾菲克睇住防線，班到救兵形勢唔同晒，對住「錘仔幫」，受讓平半值得冷敲。（now638台周二凌晨2:45直播）




季初白禮頓同修咸頓爭榜首，證明實力唔嘢小，上季領軍得到英甲錦標嘅普耶，球員時代効力車路士無論隊友定對手都好尊重佢，感染力相當強，當佢知道隊長湯美艾克菲重傷收咧，即刻向西布朗借用智利國腳干沙路查拉救亡，目的係穩定軍心，擺脫連盃賽近7場3和4負頹勢，球員睇到應該識做省招牌。


艾拿戴斯冇心長撈挫軍心


唔好以為干沙路查拉係閒人，其實佢係西布朗升上英超嘅功臣，只不過今季被打入冷宮，白禮頓至可以借用佢到1月，為咗唔想返西布朗坐冷板，相信干沙路查拉會畀心機踢波博留喺白禮頓，唔擔心佢會揸流攤，條防線夠晒硬淨。仲有，白禮頓射手馬卡爾史密夫同艾殊利班尼斯今季各有5個聯賽入球，火力咁猛，有條件搶分反彈。




至於剛啱喺聯賽不敵修咸頓嘅韋斯咸，始終財政問題嚴重，領隊艾拿戴斯根本冇諗住長撈，近日佢仲爆響口話，假如英格蘭足總開聲，佢會即刻答應做國家隊新主帥，球員聽到難免拖低士氣，更何況韋斯咸近6場得2勝2和2負，作客讓波真係要唔過。