士砵亭超班殺「迪」冇手軟

猪拉多纳

24/10/2011
文： 力奇

一口氣連贏8場嘅葡超老牌勁旅士砵亭，今晚喺主場迎戰中游分子基維辛迪，憑住強勁氣勢、地利同超班質素，要大勝一場話咁易，捧1.88倍「讓球主勝」啦！（開賽時間：周二凌晨3:15）




今夏大事擴軍嘅士砵亭，論人腳絕對唔差得過班霸波圖，只係季初未夾熟，曾經一度喺葡超同歐霸盃連和3場。操起狀態之後，士砵亭近10戰就贏咗9場，當中近8場仲係全勝添，論氣勢，全歐洲都冇乜邊隊拍得住佢哋。


基維辛迪近5戰僅1勝


睇埋人腳，除咗人氣翼鋒迪亞高卡普同謝法倫有貨交之外，其餘好似荷蘭射手雲禾夫斯雲高咁，仲盛傳獲曼聯垂青，智利中場馬迪亞斯費南迪斯近排又係愈戰愈勇，搞到各大豪門都流晒口水。據講守將安恩胡今仗可以傷愈披甲，即使佢唔踢得都好，之前喺歐霸盃頂上嘅安達臣普加同丹尼爾卡列高其實一樣咁穩陣，無後顧之憂，班前鋒就可以專心喪攻啦！




基維辛迪今季重返葡超後表現不過不失，依家排喺聯賽榜第9位。不過睇番佢哋近5戰只係得1勝，近6次作客士砵亭仲輸足5次，今晚憑乜搶分先？