|
|
15/10/2011
文： 查里阿蛋
今季小妹真係畀拜仁嚇親，佢哋由作客禾夫斯堡開始，聯賽加盃賽夾埋連贏10場，兼夾場場0失球，加上馬里奧高美斯自上季大爆發後，今季入波就似食生菜咁Easy！直至上仗賽和賀芬咸斷纜谷埋一肚火，今晚德甲仲唔炒哈化柏林出氣咩！不過，玩「讓球主勝」只得1.48倍冇肉食，反而入球大細中位數3.5球，個「大」盤有成2.05倍鬼咁吸引，可以幫大家生金蛋㗎！（有線61及64周六晚9:30直播）
列貝利 奧歷傷愈
洛賓傷完又傷，上個禮拜先做完手術唔知要抖幾耐，好彩今季已經貢獻3個助攻同4個入球嘅列貝利及時復出，對拜仁嚟講無疑係一大支強心針！32歲嘅射手奧歷傷咗半年亦告好番，仲話希望同拜仁續約，就算後備上陣都一定落力過人。加埋成班德國國腳踢歐國盃咁好火，小妹就睇好佢哋將呢團熊熊烈火帶返嚟球會，實行將哈化柏林落鑊大炒！
哈化今季戰績麻麻，上場雖然送咗3隻光蛋畀科隆，但作客只係贏過開季勢頹嘅多蒙特，今鋪點睇都頂唔住拜仁。不過，佢哋嘅入球能力其實唔算太差，8戰入12球，仲要係近7場聯賽都有入波，就算話拜仁鋼門紐亞已經保持咗1,018分鐘不失球紀錄，但長路有盡時，話唔定今仗畀哈化偷雞入一粒，要開入球大就話咁易啦！
|
|
金睛卡
发表于 2011-10-15 12:08
变色卡
显身卡