皇馬「-2」讓唔起貝迪斯

猪拉多纳

15/10/2011
文： 郭球奇

每逢國際賽後，都係「FIFA病毒」散播嘅高峰期，皇家馬德里近日就疑似中咗招，今晚喺西甲主場對貝迪斯，多名星級國腳都未必回得切氣，況且近年喺巴拿貝對住貝迪斯冇絕對優勢，球奇覺得貝迪斯今場受讓2粒，絕對有機偷雞開出2.65倍「讓球客勝」！（now632及660台周日凌晨0:00直播）




近兩個禮拜國際賽期，皇馬大部分球員基本都返番所屬國家隊踢國際賽，要應付咁頻密嘅賽程，難免會有人受傷，結果中堅艾比奧爾就被隊友撞傷眼證實要抖3周；C朗亦因為幫葡萄牙太搏命，結果亦缺席咗皇馬周四嘅晨操，雖然唔影響落場，但狀態就未必百分百。




仲有呀，希古恩、迪馬利亞同馬些路都因為啱啱返南美比賽，喺搭長途機一來一回下，今晚狀態好極有個譜。雖然本來有傷嘅前鋒賓施馬、中場紐尼沙軒、後衞比比同法比奧干查奧近日都已恢復操練，今晚可以復出，但佢哋4個冇正式比賽已有一段日子，落到場交唔交到貨始終令球奇懷疑。


貝迪斯作客巴拿貝少大敗


今季重返甲組嘅貝迪斯，季初係威係勢，一度進佔榜首，但近期狀態有所回落錄得2連敗，慶幸之後撞正國際賽期回一回氣，今晚隨時又做攔路虎都未定。賽前貝迪斯宣布前鋒辛達告魯斯、中場謝法臣蒙迪路同後衞托錫都踢完國際賽歸隊，並且都冇穿冇爛，今晚可以照舊上陣。門將卡斯圖仲話只要球隊對自己踢法有信心，絕對唔使驚皇馬，中場比納特更揚言去到巴拿貝畀到佢額外動力，有信心製造驚喜。事實上，貝迪斯近幾次作客皇馬戰績唔曳，今場對手又有歐聯後顧之憂，絕對有本錢唔使大敗，甚至成功搶分。


橫數千軍


皇馬C朗少開首球




‧近8戰6勝1和1負，半場未試過落後。

‧C朗暫以7球排射手榜第2，但只得1球是首名入球。

貝迪斯連開5場單

‧近8戰5勝1和2負，連續5場開單。

‧近6次交手戰績唔算太差，獲2勝1和3負。

皇馬主場對貝迪斯炒唔起

日期 賽果

09/02/21 皇馬 6:1 貝迪斯

07/09/27 皇馬 2:0 貝迪斯

07/02/17 皇馬 0:0 貝迪斯

日期 賽果

07/01/18 皇馬 1:1 貝迪斯

06/03/19 皇馬 0:0 貝迪斯

06/01/25 皇馬 1:0 貝迪斯