美國身經百戰 -2照奏凱哥

猪拉多纳

02/07/2011
文： 吉拿甸奴

細路對大人，會有咩後果？美國今晚喺女子世盃C組對哥倫比亞，讓兩球都照追，雖然哥倫比亞頭場僅以0:1不敵瑞典，但佢哋全場捱打，球員又唔夠經驗，連王牌蓮干同隊長嘉坦都係90後，相反美國擺大頭又踢慣大賽，點睇「-2」都抵捧啲！（有線64及中央5台周日凌晨0:00直播）




哥倫比亞係今屆女子美洲國家盃亞軍，但期間曾經慘吞巴西5隻光蛋，證明好打有限，日前對住瑞典更加好似倒瀉籮蟹，所謂食胡球員蓮干同嘉坦，分別得17歲同20歲，而且嘉坦同佢嘅後防拍檔艾拉絲都係美國大學聯賽球員，佢哋嘅打法同弱點肯定畀人起晒底，今場後防更加危。


加強鋒力谷入波


至於美國頭場以2:0打沉北韓，霸氣就唔算好夠，但總算叫做表現對辦，傳媒更加爆出，美國領隊桑夏治頭場開波前先至決定用前鋒羅倫珍妮串演左翼，擺出介乎442至433嘅陣式，目的係加強火力，結果真係靠羅倫珍妮先開紀錄，有心谷起隊波應該入球陸續有來。




事實上，上場為美國打正選嘅射手雲芭芝、中場博絲、奧蕾莉、萊德同隊長拉姆邦妮，全部代表國家隊上陣逾100次，36歲嘅拉姆邦妮更先後踢過3屆女子世盃同奧運女足賽事，就算佢體力有啲下降，帶住成班身經百戰嘅隊友，都應該可以好似大人玩細路咁，砌低哥倫比亞女足連贏兩場。




賽制：16支球隊分4組，每組4隊，採單循環制，勝得3分，和1分。每組首、次名將進身8強。