仙台當旺搵清水復仇

猪拉多纳

26/06/2011
文： 九叔

無論係一個人定係一隊波，順起上嚟乜都可以當係佢哋嘅成功因素，好似响日職開季12戰不敗嘅仙台維加泰，呢期咁掂據講係因為充滿家庭嘅愛喎，唔理你信唔信都好，今日仙台作客清水心跳，受讓平半點都要捧吓客隊嘅場。（now633台周日下午5:30直播）




仙台上星期主場炒咗甲府風林4蛋，北韓仔梁勇基先開紀錄，後衞渡邊廣大亦攞到自己今季首個入波，呢兩位仁兄腳風咁順，日本傳媒話係拜家庭喜事所賜喎，其中梁勇基响上星期日榮升老竇，佢老婆幫佢生咗個囝囝；渡邊廣大打波嗰日，碰啱係佢老婆生日，渡邊太太同兩個仔一齊响看台睇波幫佢打氣，呢個愛的家族歡喜二重奏，幫助咗仙台咁話。


梁勇基做老竇鎌田娶老婆


到咗尋日，呢個二重奏仲升呢變咗三重奏添，仙台個25歲後衞鎌田次郎宣布打完今場波之後，就會同相識多年嘅女朋友辦註冊手續結婚，佢兩個原來响蒲田高校係同級同學嚟架，認真長情！




當然，如果沖喜吓就可以贏波，哥迪奧拿、莫連奴、費格遜呢啲名帥仲有得撈嘅？C朗、美斯都唔使炒到咁貴啦。雖然呢啲贏波元素冇乜根據，但係仙台走勢好順又確係事實，呢支地震災區球隊開季不敗，係今季日職唯一一支不敗之師，靠嘅就係一股士氣，尤其今場對住清水，佢哋嘅戰意只會更加高昂，事關上季第6周作客清水慘敗1:5之後，佢哋就展開咗一個14戰不勝嘅慘痛經歷，班球員都記憶猶新，渡邊廣大更咬牙切齒話今場要有仇報仇。


清水澳洲鐵衞坐波監


清水嗰邊都知仙台氣勢正勁，講到明要集中精神打好呢場硬仗，不過佢哋始終有澳洲後衞保斯拿停賽，呢條鬼仔唔只防守好，今季仲助攻射入過1球，冇咗佢清水條防線點都有啲顧慮，仙台莫講話有權唔輸，贏埋創造13戰不敗都唔奇。