瑞士刺殺狂牛

魑魅魍魉

25/06/2011
文： 麥馬拿仁

今晚上演U21歐國盃決賽，西班牙U21同瑞士U21於中立場決一高下。論名氣、實力，「小牛兵團」稍勝一籌，但把握力卻遠遜大國腳，四強對白俄羅斯幾乎被死守屈出局。瑞士實而不華，四戰一球不失，受讓半一捧下盤，細盤亦好路！




（now 633及660周日凌晨2時45分直播）




西班牙近年橫掃球壇，U21踢法同大國腳一樣，都係靠小組推進，靠地波入滲於中路進攻，但球隊冇沙維、恩尼斯達、韋拿同柏度洛迪古斯，小將們周時受制於對手密集防守，去到禁區頂已行人止步，四強對死守嘅白俄羅斯入肉埋門唔多，要去到完場前先追平，繼而於加時贏波晉級，1.18倍熱W都開唔出。


瑞士未失過波


事實上，巴塞前鋒保贊、中場謝法倫淪為後備，而主將桑馬達亦踢唔出水準，僅得前鋒阿祖安盧比斯支撐大局，於決賽面對實力更強嘅瑞士小將，相信要破關唔易，個W熱到1.57倍根本唔抵玩。




瑞士U21今次於歐國盃決賽周表現一流，踢法成熟具效率，分組賽三戰全勝殺入四強，面對捷克亦控制戰局，如非梳頓沙基利完場前射中柱，根本唔使去到加時先贏波。瑞士後防非常紮實，由分組賽至四強四場波一球不失，整體演出絕不比西班牙遜色，而且去到決賽雙方都謹慎，對防守一方更加有利，瑞士打穩守突擊隨時收死對手，受讓半一好路，細盤亦可兼顧。


近八屆U21歐國盃決賽成績


年度 戰果

09 德國 4:0 英格蘭

07 荷蘭 4:1 塞爾維亞

06 荷蘭 3:0 烏克蘭

04 意大利 3:0 塞黑

02 捷克 0:0 法國 捷克互射12碼勝出

00 意大利 2:1 捷克

98 西班牙 1:0 希臘

96 意大利 1:1 西班牙 意大利互射12碼勝出