改踢日波阿曼想蒸乾國奧

猪拉多纳

23/06/2011


今晚上演多場奧運亞洲區第二階段外圍賽次回合，首回合主場輸○比一嘅中國奧運隊，將於今晚生死戰作客阿曼。國奧出線形勢相當險峻，球員除咗要舟車勞頓，乘搭十二小時航機遠赴中東，仲要應付四十度嘅酷熱天氣，中國要進軍明年倫敦奧運，必須先過阿曼呢關！（周四晚10時15分開賽）




今場比賽安排喺當地傍晚6時15分舉行，據悉，阿曼夏季一般會安排喺晚上比賽，但今場提早開波，目的就係想「蒸乾」國奧隊球員，因為阿曼大部分地區係沙漠，係中東出名嘅高溫國家，球員喺下午莫講話踢波，甚至連呼吸都有困難，國奧為咗幫球員消暑，要特製冰背心畀球員着！


澳韓日出線在望


經過首回合，阿曼傳媒認為國奧實力一般，尤其係防線相當鬆散，阿曼力足連贏兩場出線，而國奧今仗亦極可能變陣出擊，董學升或會代替喺葡萄牙搵食嘅王剛，擔任正選前鋒衝擊阿曼大門。




除咗國奧形勢告急，其餘強隊首回合基本上已鎖定出線，澳洲首回合主場大勝也門三比○，而日本同南韓首回合主場同樣贏科威特及約旦三比一，爭持較激烈係「雙伊大戰」，伊朗首回合作客贏伊拉克一比○，而首回合輸○比一嘅北韓，次回合將作客被喻為「黃金一代」嘅阿聯酋。