施亞拉救兵到保證搏殺

猪拉多纳

19/06/2011
文： 走肖

有救兵，點都係好事，對上7場得1勝嘅施亞拉，最近一口氣簽咗4個新球員，雖然當中有3個仲未能喺今晚巴甲主場對聖保羅嘅比賽上陣，但高層咁早肯開水喉救亡，肯定有助提升士氣，平手捧施亞拉隨時有驚喜。（開賽時間：周一凌晨3:00）




施亞拉近7場得1勝3和3負，包括巴西盃不敵哥列迪巴出局，高層見唔對路，即刻將前鋒祖利亞踢去巴希亞，羅致泰拉特斯前鋒戴利、釜山偶像前鋒艾斯華度、甲府風林中場魯迪尼同保地花高中場迪根奴補充實力，當中戴利今場已可落場搏殺，其餘3個搞掂轉會手續嘅話，跟住嗰場對彭美拉斯就可以上陣。


聖保羅作客走樣


雖然施亞拉4個救兵，呢場得1個用得，但聯賽踢咗4輪，高層就肯使錢擴軍，證明佢哋好着緊護級，絕對唔似等死格局，對家聖保羅今季4戰全勝高踞榜首，表面睇好抵捧，但其實上季佢哋聯賽作客得5勝7和7負，得勝率只得26%，加上前鋒雷斯費蘭度同中堅祖奧米蘭達未傷愈，作客出事唔奇。