美國心散牙買加偷到雞

猪拉多纳

19/06/2011
文： Mic少

美洲金盃八強，東道主美國對牙買加，美國今屆演出令人失望，歷屆分組賽不敗齋缽都被打破，最大問題係球隊軍紀散漫，兩位主將當路雲及丹普西日前缺陣操練，去參加婚禮，明顯唔重視呢項賽事。牙買加三戰全勝並保持不失氣勢如虹，仲有得受讓，當然捧「讓球客勝」。（now 634周一凌晨3時直播）




雖然美國擁有唔少著名球員，但名過於實，三場分組賽除首仗贏加拿大外，另外兩仗表現乏善可陳，包括輸畀巴拿馬，自美洲金盃九一年成立以來，首次於分組賽輸波。而最後一輪生死戰，只小勝瓜德羅普一比○，球員表現冇厘神氣，似乎唔多着緊呢項賽事。




今場大戰當前，當路雲及丹普西更請假去參加婚禮，似有輕敵之嫌。美國傳媒亦批評領隊巴特利治軍無方，駕馭唔到球星，其他球員亦可能會不滿兩人擁有特權，影響球隊團結性。


巴拿馬心雄炒起薩爾瓦多


反觀牙買加踢出近年代表作，三場分組賽全勝兼冇失波，而且佢哋陣中有三分一球員効力美職球隊，對當地環境非常熟悉，猶如佔有半個主場之利，有呢班「美職兵團」助陣，牙買加唔怕主隊氣勢。




至於另一場八強巴拿馬對薩爾瓦多，巴拿馬於分組賽表現神勇，連挫「法國二隊」瓜德羅普以及主辦國美國，球員信心爆晒棚，遇上「掹車邊」晉級嘅薩爾瓦多，應可輕鬆取勝，「讓球主勝」值得捧場。




（now 634周一早上6時直播）