山度士冠軍路難行

魑魅魍魉

15/06/2011
文： 力奇

自由盃聽朝上演決賽首回合，由烏拉圭勁旅彭拿路主場鬥巴西嘅山度士。咪以為山度士有「新比利」尼馬壓陣就實食冇黐牙，查實佢哋受到智利火山爆發影響，要捱12粒鐘巴士先去到烏拉圭，狀態難免受影響，平手盤我捧主隊。（有線61及廣東體育周四早上8:50直播）




智利個普耶韋火山近排爆發，影響埋鄰近國家，想話坐飛機去烏拉圭都唔得，山度士大軍要去到比賽場地，惟有先去巴西嘅阿萊格里港，然後再坐長達12小時巴士先掂。舟車勞頓已經夠煩，最慘係大軍陣容一樣唔完整，中場重心甘素傷愈冇耐，仲未夠狀態出戰，其餘前鋒馬干費拿度、後衞里奧同莊拿芬施些路都要養傷，伊度達辛拿則要停賽，戰鬥力受損，作客波你估話贏就贏咩？


彭拿路閉門操殺着


彭拿路方面，呢支5屆自由盃冠軍大賽經驗豐富，主帥迪高阿古利亦曾經以球員身份捧盃。佢哋為贏冠軍，近排一改作風選擇閉門操練，連批超級Fans想喺球場外「偷窺」練波，都即刻畀球場保安趕走。賽前消息話，佢哋今仗唔會打盯人防守，只會用聯防去對付盛傳將過檔皇馬嘅尼馬，隊波上下信心足，有地利可先下一城。