山度士當弗鬥心爆彭

魑魅魍魉

15/06/2011
文： 笛子波童

南美自由盃周四早上舉行決賽首回合，烏拉圭彭拿路主場鬥巴西山度士。山度士在冠軍教頭拉馬曹帶領下愈戰愈勇，對上九場自由盃比賽未嘗一敗。彭拿路近七場比賽僅一勝，狀態平平無奇，縱有主場之利都冇甜頭，「讓球主客和」彭拿路讓一球，波童捧「讓球客勝」及「細盤」。（有線61台周四早上8時50分直播）




熟悉巴西波朋友，對山度士教練拉馬曹唔會陌生，呢名55歲教頭曾協助聖保羅於06至08年間成為巴甲三連霸，去年亦帶領富明尼斯相隔廿六年重奪聯賽錦標，於國內名望甚高。




自從佢喺四月初接掌山度士帥印，球隊踢咗十九場比賽只輸一場，不敗率逾九成。如果單計自由盃，由最後三輪分組賽到打入決賽，九場比賽取得六勝三和，當中六場淘汰賽未輸過，無論主場、作客表現都好穩定。拉馬曹執教生涯以來從未攞過自由盃冠軍，為圓捧盃夢決心唔使懷疑。


彭拿路近7仗僅1勝


彭拿路於十六強淘汰上屆冠軍國際體育會出局，四強再贏新鮮出爐嘅阿甲冠軍沙士菲，實力不容忽視，不過佢哋近期狀態平平，聯賽連盃賽近七場只贏一場，缺乏強攻本錢。由於今場只係首回合，而且根據賽制係唔計作客入球優惠，故此防守穩健嘅山度士唔使過於冒進，除捧「讓球客勝」之外，入球細亦係不俗選擇。