丹麥U21襲擊白俄

港陌

14/06/2011
文： 朱楓

塞翁失馬，焉知非福！雖然主辦國丹麥喺U21歐國盃首戰輸波，但原來係捧盃吉兆，預計賽前獲國家大臣探班下，今晚對住傷兵滿營嘅白俄羅斯可響勝鼓，呢場A組大戰我捧1.75倍主W！（開賽時間：周三凌晨2:45）


首戰輸波捧盃吉兆


丹麥首戰以0:1不敵瑞士，但賽後一班球員冇因為咁氣餒，當中前鋒歷奇尼路臣話球隊首仗輸在太緊張，依家輸咗反而令班人顧慮全消，喺餘下兩場全力搶攻爭入4強。事實上，睇番近5屆U21歐國盃，有3支冠軍喺揭幕戰都輸波，對丹麥而言絕對係吉兆，況且呢支主辦國喺輸畀瑞士後，獲該國性別平等部長Lykke Friis入營探班打氣，今晚脫胎換骨真係唔奇。




白俄羅斯首仗以2:0擊敗冰島，但其實佢哋佔唔到乜嘢甜頭，全靠對方臨完場輸12碼兼有人被逐先打破僵局，何況今場好大機會繼續有中場尼卡卓克同哥迪卓克因傷缺陣，想爭連捷唔易。


賽制


8支參賽球隊分為2組，每組4隊踢單循環，頭2名進身4強淘汰賽。若同分的話，將順序以下列方法定排名：1.對賽成績2.總球差3.總入球數4.抽籤