哥斯達黎加食得唔好嘥

猪拉多纳

12/06/2011
文： 樂比堅尼

美洲金盃A組最後一輪分組賽，墨西哥對哥斯達黎加，墨西哥喺今屆賽事可謂大超班，頭兩場分組賽入咗十球，但由於已取得出線權，今場有留力空間，加上陣中五名球員早前未能通過藥檢，大大影響球隊士氣，哥斯達黎加隨時乘虛而入，樂比仔捧「讓球客勝」。




（now 634周一早上8時直播）




樂比仔睇完美洲金盃首輪賽事後，已認定墨西哥係今屆嘅真命天子，因為班球員狀態真係好弗，尤其係曼聯嘅「小豌豆」查維亞靴南迪斯腳風極順，首兩場分組賽射入五球，相信即使係主辦國美國，都唔係墨西哥對手，但既然墨西哥喺分組賽兩戰兩勝後，已取得八強出線資格，今場根本冇必要搏。


墨西哥收韁讓路


事實上，墨西哥目前面對最大問題就係兵源調動，因為五名球員尼爾遜、貝姆達斯、杜亞拿斯、法蘭斯高洛迪古斯及奧祖亞未能通過藥檢後已離隊，另外奧蘇里奧亦因傷退隊，令人腳買少見少，所以今場畀部分主力抖，留力踢淘汰賽，都係人之常情。




哥斯達黎加兩戰得四分，出線亦好穩陣，佢哋今場最大優勢，就係領隊拿禾比對墨西哥球員相當熟悉，佢曾帶領墨西哥奪得○三年金盃冠軍，另外亦帶領過墨西哥出戰○六年世界盃，所以今番倒戈，好希望可取得好成績證明自己嘅實力，今仗和波對兩隊嚟講都係可以接受嘅戰果，一於捧「讓球客勝」及和局。