Group A出線分析

魑魅魍魉

11/06/2011


丹麥U21及瑞士U21普遍被認為出線機會較大，另外兩隊則較為冷門，但要留意白俄U21能在附加賽中擊敗意大利U21晉級，冰島亦能力壓德國出線，故這組出現意外賽果亦絕不出奇，其中冰島U21實力未見底，加上賽程有利，最後一仗先至要對丹麥，因此敲佢哋小組次名實在非常值博。


分組賽程


開賽時間為香港時間




白俄羅斯 Vs 冰島 6月12日凌晨零時




丹麥 Vs 瑞士 6月12日凌晨2時45分




瑞士 Vs 冰島 6月15日凌晨零時




丹麥 Vs 白俄羅斯 6月15日凌晨2時45分

丹麥 Vs 冰島 6月19日凌晨2時45分

瑞士 Vs 白俄羅斯 6月19日凌晨2時45分

丹麥U21 主場出擊劍指四強

丹麥喺U21歐國盃冇乜豐功偉績，最叻都係92年打過入4強，但今屆佢哋以主辦國身份參賽，球迷難免會對佢哋有啲期待，打入4強相信已經係最起碼嘅要求。

尤其係丹麥陣中擁有天才球星基斯甸艾歷臣，呢位阿積士進攻中場，被視為繼盧特立兄弟後丹麥最有潛質嘅球星，佢雖然只得19歲，但去年已隨大國腳征戰世界盃，經過大賽磨練，前途更加無可限量，今次領軍出戰U21歐國盃，係佢大展身手嘅好時機，另外前鋒歷奇尼路臣喺U21國家隊已累積咗11個入球，同樣係今屆丹麥喺自己地頭爭取佳績嘅關鍵人物。

主將：基斯甸艾歷臣（阿積士）歷奇尼路臣（維拉利爾）

參賽次數：第4次

上屆成績：外圍賽出局

最佳成績：4強（1992）

冰島U21 巨人殺手默契取勝

冰島呢個北歐小國，喺國際足球舞台向來都係陪跑分子，今次喺外圍賽能夠力壓衞冕嘅德國出線，相信事前講都冇人信，嚟到決賽周，相信佢哋繼續會被低估。

呢班喺國內被譽為黃金一代嘅新星，當中有多達15位球員同時已身兼大國腳，所以經驗上有一定着數。陣中如前鋒史基賀臣、傑斯拿臣、比卡比查拿臣都已略有名氣。呢班新仔由細夾到大，仲一齊踢埋國家隊，默契方面極佳，亦係冰島爭勝嘅本錢。另值得留意華迪馬臣係「小球專家」，兼職埋5人足球國腳，認真多才多藝，又即管睇吓佢嘅腳下功夫係咪特別細膩。

主將：史基賀臣（阿爾克馬爾） 貝治古蒙臣（阿爾克馬爾）

參賽次數：第1次

上屆成績：外圍賽出局

最佳成績：/

瑞士U21 新十字軍青訓收成

瑞士近年大力發展青訓，終於都開花結果，繼02同04年後，佢哋再次打入決賽周，呢支「新十字軍」以國內球員為主，不過唔少小將冒升甚快，不少已經或即將外流到歐洲主流聯賽取經。

瑞士陣中較為人熟悉嘅球員係於德甲史浩克04搵食嘅加雲洛域、丹尼爾柏夫奴域同埋盧斯頓貝加，整體配搭不俗。另外最值得注意嘅係司職前鋒嘅「黑色匕首」恩洛辛艾馬加拉，亦有機會喺今屆U21歐國盃彈出，呢位尼日利亞出生嘅草蜢前鋒，非常受外界注意，佢上月首次入選大國腳，並深得領隊希斯菲特器重，瑞士能否出線都要睇佢表現。

主將：加雲洛域（史浩克04） 恩洛辛艾馬加拉（草蜢）

參賽次數：第3次

上屆成績：附加賽出局

最佳成績：4強（2002）

白俄羅斯U21 毫無壓力或有驚喜

白俄羅斯從未打入過任何大賽嘅決賽周，但今次已經係佢哋連續第2屆打入U21歐國盃決賽周，對佢哋嚟講，能夠再次進身決賽周已係了不起嘅成就。

更何況，白俄今次仲要喺附加賽淘汰5屆冠軍意大利，所以即使佢哋未能喺決賽周再進一步，相信佢哋亦會收貨。佢哋上屆決賽周和波攞到1分，今次嘅目標係喺冇壓力下贏番1場，超越上屆成績。

呢班後生仔最值得留意係中場施華哥夫，呢位「新希比」兩年前已經被意大利球會卡利亞里收購，上季被外借到波蘭球會克拉科夫，係白俄今屆嘅領軍人物。

主將：施華哥夫（克拉科夫）尼卡卓克（巴迪）

參賽次數：第3次

上屆成績：分組賽出局

最佳成績：分組賽（2004,09）

推介

首名：丹麥

次名：冰島