心跳上門求籤 飛腳又做黃大仙

魑魅魍魉

11/06/2011
文： 蘇豪

是日日職賽事大阪飛腳主場對清水心跳，飛腳今季於聯賽攻強守弱，六場聯賽全數開大，堪稱日職黃大仙，今次又有三個守將缺陣，防守力大打折扣，隨時入埋唔夠輸，主勝賠率偏熱信唔過，捧1.54倍大更佳！（now 633周六晚6時直播）




大阪飛腳聯賽六戰四勝兩負，合共攻入十二球，同時失咗十二球，平均每場有兩個士哥及失波。飛腳上場作客川崎前鋒，戰至尾段被對手射死輸一比二，後防集中力明顯不足，本周又有守將山口智、高木和道及下平匠休戰，預計會以攻代守，盡量爭取士哥。


山葉幫鯨魚起肉


清水心跳中場小野伸二及箭頭高原直泰傷勢無礙，澳洲攻擊球員保斯基亦可候命，另外，小將大前元紀現時已有兩球進帳，於前線頗具威脅力，有力射破飛腳大門。心跳近三次作客飛腳未輸過，曾以四比一及三比二贏波，今場捧大之餘，亦可兼顧「讓球客勝」。




同日磐田山葉主場對名古屋鯨魚，山葉聯賽主場三戰兩勝一和，演出平穩。計同聯賽及亞冠盃，鯨魚近四場作客輸晒，演出唔多對辦，今場莊家開出平手盤，一於捧山葉！ （now 633周六下午1時直播）


前鋒回勇做「大」騷


另外，川崎前鋒主場對甲府風林，前鋒近期全面回勇，對上四場不敗，合共轟入十球。今場面對風林又可連番數胡，投X首選入球大。


日職推介


磐田山葉 平手盤

川崎前鋒 大

大阪飛腳 大