法國訪烏克蘭 攻細難求

猪拉多纳

06/06/2011
文： 牛奶仔

今晚國際熱身賽由兩支主守嘅球隊互撼，已經連續4場開出入球細嘅法國，會造訪來年歐國盃主辦國之一嘅烏克蘭。法國3日前先踢完歐國盃外圍賽，相信班疲兵未有咁快回到氣，但話晒近8戰僅失2球，入唔到波都應該守得住，熱捧1.62倍入球細最正路。（中央5台周二凌晨3:00直播）




法國踢埋今場之後，3日後又會同波蘭拍跳，計埋日前作客白俄，7日內就要踢3場波，都真係幾攞命。白蘭斯今次選咗26人出征，陣容都算唔細，不過絕大部分都係中前場球員，後衞就只係得7件，而且絕大部分都係二閘球員，因此今場波多數都會由近期穩佔國家隊正選嘅阿爾拉米，夥拍馬馬度沙高打雙中堅，相信國家隊近期低失球率可望保持。


烏克蘭仲係靠老將孭飛


不過，法國將穩守戰術發揮得淋漓盡致嘅同時，反擊卻唔多奏效，白蘭斯上任以來，10場波都未有1仗入多過2球，搞到近9戰就有8場開細，今次作客實力不俗嘅烏克蘭，相信亦難有「大」作為。




作為下年歐洲國家盃主辦國之一，烏克蘭惟有踢熱身賽保持狀態。前蘇聯名將布洛堅4月重掌帥印之後，日前首次領軍即以2:0擊敗烏茲別克，終止6場不勝頹勢。不過布洛堅早前決定唔徵召有份踢U21歐國盃決賽周嘅7名新星入伍，因此今仗只能夠繼續以老將舒夫真高同禾路連掛帥，難以攻破法國固若金湯嘅防線。