高佬使得市原斬草除根

港陌

04/06/2011
文： 走肖

得高佬、得天下？草津溫泉今午喺日乙主場對千葉市原，唔似頂得住唔輸，上季甲府風林1米94「屈機中鋒」夏雲拿成為日乙神射手兼助球隊升班，今季市原即刻跟風，羅致阿里辛特2米04嘅「衝擊巨人」艾萊打江山，結果開季有6勝1和1負暫列榜首，旺開有條路，1.95倍客W跟得過。（開賽時間：周六下午3:00）




上季市原喺日乙排第4位，今季前線加碼羅致阿里辛特中鋒艾萊，結果踢得更生猛，除咗佢自己攻入3球，上季得1個聯賽入球嘅1米61嘅前鋒深井正樹都翻生，上星期入波後今季累積4球進帳，帶挈市原開季有6勝1和1負高踞榜首，證明被日本傳媒形容為「衝擊巨人」嘅艾萊，作用非常大。


草津溫泉矮仔中堅難頂


講到高佬征服日乙，其實好正常，事關日職最硬淨嘅中堅田中鬪莉王，都係得1米85，試問日乙嘅後衞點嘜得到超過2米嘅艾萊？對家方面，溫泉近期用開嘅後衞當中，最高嘅御廚貴文得1米80，跟住嘅田中淳得1米78，對住艾萊感覺好似細路同大人玩，睇怕好難搞得掂呢個巨人，市原有中場米利根被澳洲國家隊徵召都唔怕。