歐洲球壇最後衝刺

猪拉多纳

29/05/2011
文： 朱楓

歐聯踢完，仲有意大利盃同法甲！歐洲各大聯賽相繼收爐，今晚就係5大聯賽嘅終極之夜，意大利盃決賽同法甲煞科戰同時喺香港時間周一凌晨3點上演，究竟國米會唔會捧盃？摩納哥成功護級定里昂搶到來季歐聯入場券？歐洲球壇最後衝刺，大家記得落足眼力嘞！


國米半打主力缺陣讓唔起傻豹


意盃決賽爆發，國際米蘭同巴勒莫會喺羅馬奧林匹高球場爭標！國米受傷停困擾，陣容天殘地缺，遇着意甲奇兵巴勒莫，唔似可以喺法定時間內解決對手，朱楓建議大家博2.1倍「讓球客勝」！（廣東體育周一凌晨3:00直播）


李安納度冇盃捧即炒


季中改由李安納度執教嘅國米，今季表現唔多掂，一早喺歐聯出局，意甲最後得亞軍，殺入今晚意盃決賽，已經算係國米嘅最大成就。賽前國米班主莫拉堤講到明，李安納度一定要領軍捧走意盃，先會考慮同唔同佢續約。




查實李安納度真係幾慘，佢班藍黑兵跌Watt兼傷兵不絕，先有蘭奴捷亞胃痛引發高燒，中場辛尼迪又話扭傷腳踝，連史奈達亦只係啱啱好番，加埋右閘馬爾干停賽，甘比亞素同後衞哥度巴又繼續倦勤，半打主力唔踢得，李帥想滿足老細捧盃欲，怕且唔係咁易噃！


巴勒莫柏斯托尼勁Sharp


對家巴勒莫近6戰4勝表現唔錯，老牌前鋒米高利固然有料到，講到最Sharp醒嘅，就肯定係柏斯托尼，據講國米、皇馬同車路士都想斟佢，呢位阿根廷新星今晚肯定加多兩錢肉緊，就算中場巴斯洛域同後衞保禾停賽，國米都唔係咁易搞得掂「傻豹」！


近5屆意盃冠軍


2009-10 國米

2008-09 拉素

2007-08 羅馬

2006-07 羅馬

2005-06 國米

賽制

決賽一場過分勝負，若法定時間內打成平手則需加時，若未能分出高下則互射12碼。

國米對賽旺開大

‧近7屆意盃6次殺入決賽，但只得3次封王。

‧近6次交手獲4勝2和，當中有4場開大。

巴勒莫近10戰5勝

‧對上2次入意盃決賽都輸波。

‧近10場獲5勝2和3負，不敗率70%全開大。