威爾斯尾胡攞彩

魑魅魍魉

27/05/2011
文： 樂比堅尼

由英倫三島成員愛爾蘭、蘇格蘭、威爾斯及北愛爾蘭角逐嘅四角賽，終於嚟到最後一輪，香港時間周六凌晨將上演北愛爾蘭對威爾斯，北愛今次參賽以年輕球員為主，首兩仗慘吞八蛋，相信嚟到最後一場都難望翻身，威爾斯有望攞番個尾彩，樂比仔捧1.88倍客W！（周六凌晨2時45分開賽）




呢項名為Carling Nations Cup嘅賽事，由四支英倫三島球隊參加，賽事於愛爾蘭舉行，採單循環制，目前愛爾蘭同蘇格蘭都係兩戰兩勝，兩隊將於周一凌晨爭奪冠軍，今場北愛爾蘭對威爾斯雖然只係例行公事，但以威爾斯誠意較佳！


史必掌帥開齋食機


睇番威爾斯嘅人腳，陣中包括比拿美、艾朗藍斯及安梳爾等主力，其中比拿美同艾朗藍斯上仗都只係擔任後備，大有留力踢今場波嘅味道。威爾斯領隊史必喺今年二月首次領軍，但帶咗三場波全部輸晒，今場對住魚腩北愛爾蘭，絕對係佢開齋最佳良機！




其實北愛爾蘭近年國際賽成績唔錯，世界排名亦遠高於威爾斯，但佢哋對待今次賽事嘅誠意，就遠遠不及威爾斯，陣中大部分都係年輕球員，較為人熟悉嘅左閘佐治麥卡尼、門將米克泰萊同埋前鋒大衞希利都冇入選，領隊坦言希望畀新人吸取經驗，面對經驗豐富嘅威爾斯，睇怕都難逃一敗！