史浩克搶登堡座

港陌

21/05/2011
文： 走肖

一人有一個夢想，西班牙傳奇魯爾堅有機會重返國家隊，試問佢點會唔搏？至於喺轉會市場勁搶手嘅德國鋼門紐亞，就可能轉會拜仁4年勁袋2,500萬歐元人工，今晚德國盃決賽杜伊斯堡對史浩克04，魯爾同紐亞肯定會出真功夫博捧盃，史浩克1.42倍熱W要捧。（無綫翡翠台及廣東體育周日凌晨2:00直播）




今場波喺柏林中立場舉行，相信冇人估到，33歲嘅魯爾今季喺史浩克踢得咁掂，聯賽加盃賽勁入19球，西班牙教頭迪保斯基證實，其實佢一直有留意魯爾嘅動態，唔排除會重召佢為國家隊効力，對於魯爾嚟講，重返國家隊嘅吸引力應該同贏德國盃差唔多，只要佢嚟料，史浩克就有機會終止6連敗走勢。


杜伊斯堡交手輸條街


仲有呀，德甲煞科戰因傷缺陣嘅史浩克前鋒法芬，今場可以復出，火力更加有保證。論到後防方面，連續8場失波嘅史浩克的確好唔掂，近4場仲狂失13球，不過德國傳媒話，拜仁願意將收購價提升至2,500萬歐元，另開4年總值2,500萬歐元合約羅致史浩克門將紐亞，解決到轉會問題，佢應該會振作重現鋼門本色。




另一方面，杜伊斯堡近期成功簽入中國球星邵佳一，受到唔少人注目，不過佢哋晉級過程中嘅德甲對手，只得科隆同凱沙羅頓，未受真正考驗，對上5次喺聯賽交手又得1和4負，完全被食住，加上今季分別攻入9球、8球嘅首席射手巴查克同次席射手美亞賀化都未好番，唔似有本錢爆冷喎！


近5屆德盃決賽


09/10 拜仁慕尼黑 4:0 雲達不來梅




08/09 雲達不來梅 1:0 利華古遜

07/08 多蒙特 1:1* 拜仁慕尼黑

06/07 紐倫堡 2:2** 史特加

05/06 拜仁慕尼黑 1:0 法蘭克福

註：*加時拜仁勝2:1，**加時紐倫堡勝3:2