山度士Vs國體會「大」有睇頭

港陌

21/05/2011


巴甲首輪其中一場重頭戲，山度士主場對國際體育會，山度士一向係森巴球星搖籃，現時陣中人才鼎盛，攻擊力尤其強橫，今次喺自己地頭出擊，踢法必更加進取。對手國體會亦屬傳統勁旅，作客亦唔會示弱，今場隨時互相搏槌，捧入球大啱數。（周日早上8時開賽）




山度士鋒線有超新星尼馬、曾効力巴塞嘅射手基利臣，仲有前曼城中場艾蘭奴，進攻火力十足。事實上，山度士以踢法悅目聞名，上季入球及失球都多，首輪主場出擊，山度士當然希望於球迷面前揚威，打響頭炮，今仗應會狂攻客軍。


預咗兩軍會駁火


國際體育會係○六及○九年嘅巴甲亞軍，實力絕對唔可以小覷，陣中人腳不俗，擁有前阿根廷國腳迪阿歷辛度。今季向法甲球隊波爾多借用咗阿根廷前鋒卡雲拿基，攻力有增無減，今仗作客料一樣可以取得入球，既然兩隊都咁攻得，大盤乃不二之選。