史浩克飲勝！

港陌

21/05/2011
文： 蘇斯黑柴

今夜德國盃決戰，乙組仔杜伊斯堡喺中立場柏林奧林匹克球場挑戰史浩克04，勝方可以搶埋下屆歐霸盃入場券，史浩克實力高決心夠，力足輕取陣容嚴重不整嘅杜伊斯堡，黑柴捧2.3倍「讓球客勝」。（無綫翡翠台周日凌晨2時直播）




杜伊斯堡本來係德乙實力分子，季初一度高踞榜首，可惜季中起撞邪，大批主力輪流受傷，而且傷親都大大鑊，甚至搞到提早收咧，令佢哋下半季成績直線下滑，最終升班好夢成空。杜伊斯堡喺德國盃準決賽有主場之利，都要靠球證誤判兼極好運氣下至淘汰同屬德乙嘅科特布斯，計級數根本唔算叻。




杜伊斯堡多名主力缺陣，當中最慘情係多蒙特借將祖利安高治，呢位二十歲小將上半季踢到曉飛，被《踢球者》網站選為今季德乙最佳後衞，但較早前因膝傷提早收咧，搞到球隊防線大亂。




首席射手巴查克同中場大將約根森姆爾亦因傷缺陣，守將般奴索拉斯停賽，至於衝刺力強嘅次席射手美亞賀化之前因傷抖咗一大輪，今仗賽前剛復操料先任後備，軍醫話最多只能踢三十分鐘，甚至右閘班捷文卻恩同中場老大哥根歷都係帶傷上陣，戰鬥力劇減三成。球隊曾經三次打入德國盃決賽都鎩羽而歸，今次都好難改變命運。


贊助商泵水8.8億打氣


史浩克能夠殺入歐聯四強已經係一大成就，近六場比賽全敗，好明顯係hea踢留力今仗，佢哋今仗可排強陣出擊，一眾主力紐亞、魯爾、法芬、亨特拉爾同賀維迪斯級數超班，加上賽前得到贊助商俄羅斯天然氣公司提高條件續約，未來五年將獲八千萬歐元（約八億八千萬港元）贊助，當然更加興奮，今晚贏杜伊斯堡兩、三粒捧盃相信唔係難事。