前鋒周五醒神摘櫻花

魑魅魍魉

20/05/2011
文： 走肖

真係旺得咁緊要？大阪櫻花今晚喺日職主場對川崎前鋒，讓波捧唔過，雖然櫻花近期個勢唔錯，但佢哋3日後要應付亞冠盃16強嘅「大阪打吡戰」，今場好難去盡搶3分，而且前鋒過去8次喺星期五踢聯賽，攞到7勝1和旺到爆，加上中場靈魂中村憲剛翻生，受讓平半抵撐。（開賽時間：周五晚6:00）


大阪櫻花兼顧亞冠易走樣


由於要遷就櫻花踢亞冠盃，今場比賽提早喺今日進行。其實自從04年升班後，前鋒未試過喺星期五踢聯賽，但日乙時期踢8次，佢哋有7勝1和，所以球員對呢場波特別有信心，上周對鹿島鹿角大演「助攻帽子戲法」嘅中村憲剛就話，3分志在必得，而且要砌低晒所有日職「亞冠盃球隊」，證明前鋒有爭標實力。




雖然已經復操嘅中場稻本潤一，未夠比賽狀態復出，但上周贏鹿角3:2嘅比賽，王牌射手祖尼奴同新加盟嘅山瀨功治分別搵到今季開齋入球，可以話信心返晒嚟，後備殺手小林悠今季更加有兩球進帳，以牌面計，前鋒嘅攻擊球員級數同整體進攻瓣數，肯定好過主力不斷流失嘅櫻花，受讓點都有着數。




事實上，櫻花開季前放走首席射手阿祖安奴費拉拿後，明顯唔夠兵力兼顧亞冠盃，即使分組賽有4勝2負出線，日職就落得4和1負收場，睇得出櫻花對聯賽嘅重視程度，唔及亞冠盃咁高，好衰唔衰，佢哋喺亞冠盃16強又抽中對非常惡啃嘅大阪飛腳，今場敢唔敢搏盡搶3分呢？唔似喎，有後顧之憂要唔落。