歐聯決賽咪睇低曼聯

魑魅魍魉

18/05/2011
文： SAMVO肥叔

臨近季尾歐洲幾大聯賽幾近塵埃落定，雖然西甲及英超等賽事護級形勢緊湊，但整體生意唔算特別好，眼見愈來愈少波玩，肥叔都有些少失落。不過，嚟緊歐霸盃及歐聯決賽陸續上演，歐聯決戰勢必掀起本季最後一個高潮，牌面睇巴塞高啲，但肥叔始終認為曼聯喺溫布萊佔主場之利可留意。


操盤手季尾痛擊大戶


戰至季尾唔少菠菜人士獲利離場，一班大戶卻臨尾香，近兩周連番受挫損手爛腳，幾近將全季盈利敗晒。大戶喺幾場關鍵戰役出事，包括車路士對紐卡素同巴塞隆拿對拉科魯尼亞，佢哋啲電腦程式一啱數就落注，兩場玩晒上盤，結果畀操盤手跣到攤攤腰，今季埋單成績都唔多理想，足見各地操盤手水平不斷提高，有能力同大戶抗衡。


意甲默契波離晒譜


另外，意甲去到呢個階段愈來愈離譜，好多莊家唔開盤，上周國際米蘭對拿玻里，初盤開平手盤，國米領先時變咗拿玻里讓半球，最終雙方各得一分，睇完比賽過程及盤口變化，明眼人都知乜事。肥叔唔止一次講過，呢類賽事對菠菜界發展冇幫助，甚至影響整個聯賽形象，無奈呢啲正正係意甲特色，玩得呢個聯賽，就預咗有呢種情況。