史篤城抽水報仇

港陌

17/05/2011
文： 樂比堅尼

英格蘭足總盃曲終人散，三日後兩支決賽球隊又喺英超相逢，曼城三十五年來首奪錦標，球隊上下興奮不已，慶祝時玩大咗，飲多兩杯好正常，領隊文仙尼都唔敢詐型。難得歐聯入場券已在手，今仗主場對手下敗將史篤城，亦無謂喺對方傷口灑鹽，樂比仔冷敲2.82倍「讓球客勝」。（有線201及301台周三凌晨2時45分直播）




足總盃決賽後安排呢場快車戲碼，唔好話班球員唔想踢，連球迷都失去睇波意欲。本來喺曼城未取得聯賽前四名之前，今場快車非常關鍵，因為根據足總規定，若足總盃冠軍係聯賽前四名球隊，足總盃亞軍就可以候補身份取得歐霸盃資格，如果曼城僅得聯賽第五，另一張歐霸入場券就會落喺聯賽第六名身上，故早前有陰謀論指史篤城會放水，保送曼城入前四。但既然依家曼城聯賽穩入前四，史篤城已順利取得歐霸參賽資格，以上陰謀論已唔成立，令今仗變成真正嘅例行公事。


曼城達標 嘩鬼放縱


曼城三日前決賽先以一比○擊敗史篤城，牌面確係高史篤城一截，但今場主Ｗ僅得1.35倍，真係睇落都唔開胃，相信有睇決賽嘅朋友都會認同，曼城捧盃過程絕非一面倒，史篤城亦有機會爆冷。事隔幾日曼城爭勝決心大減，話就話領隊文仙尼曾下禁酒令，但班嘩鬼好似巴洛迪利、米卡李察士仲要連夜慶祝，想保持番決賽嘅水準都幾難。另外隊長泰維斯醞釀離隊，今仗可能避戰，曼城無論喺心理上或生理上，都非處於最佳狀態。


近六次交手全細再追


史篤城失落足總盃冠軍固然失望，但佢哋以Underdog姿態殺入決賽，即使輸波亦無打擊士氣，而且取得一席歐霸盃入場券，對呢間細球會嚟講已算超額完成，球員將輸波嘅仇恨發洩喺今場比賽，隨時有意外驚喜，贏波一啲唔出奇。今季兩次交手，曼城一勝一和唔算太有優勢，而且近六次碰頭兩隊都係開細，今場捧「讓球客勝」之餘，不妨捧埋細盤！




本報綜合報道