地膽史雲斯火燒森林

猪拉多纳

16/05/2011
文： 亨格比利

史雲斯同諾定咸森林今晚再續前緣，進行英冠升班附加賽次回合賽事。首戰雙方互交白卷，今鋪輪到「主場王」史雲斯坐擁地利，靠打整體嘅佢哋依然值得秤先，捧1.85倍主勝。（now638台周二凌晨2:45直播）




上仗開波唔夠兩分鐘，史雲斯就有尼爾泰萊被逐，雖然晨早就以寡敵眾，但查實史雲斯個勢唔曳，冇刻意死守不特止，中前場嘅史葛冼佳亞、尼敦戴亞同波連尼依然搞到森林後防風聲鶴唳，今晚返主場肯定踢得更進取。


諾定咸森林進攻板斧少


賽前史雲斯已經為左閘尼爾泰萊上訴，打唔打得甩仲係未知數，至於由車路士借番嚟嘅波連尼腿筋有傷未必踢，不過史雲斯兵源雄厚，即使領隊羅渣士派勞基摩亞或者杜比擔正，前線一樣有睇頭。




有睇首回合嘅朋友，都知森林嘅攻勢多數集中喺右邊，靠晒保羅安達臣策劃，據講史雲斯領隊羅渣士已經度好一套針對性部署嘜實保羅安達臣，森林嘅如意算盤未必再打得響。況且史雲斯係英冠主場王，今季錄得15勝僅3負，只係失咗11球咁大把，小弟真係睇唔出森林有咩「符弗」攞着數囉！


好波有得睇


英冠‧史雲斯 Vs 諾定咸森林




now638‧周二凌晨2:45

法甲‧比斯特 Vs 里昂

廣東體育‧周二凌晨3:00

直播以電視台公布為準