史雲斯W得森應手

猪拉多纳

16/05/2011
文： 麥馬拿仁

英冠附加賽四強次回合，史雲斯返福地可勝諾定咸森林！史雲斯主場威力勁，屬本季英冠「主場王」，成績仲好過「一哥」昆士柏流浪，球隊信心爆棚；森林作客戰鬥力減半，季尾三鬥勁旅全部輸晒，更狂失九球，牌面輸晒，主W1.85倍嗒得落。 （now 638周二凌晨2時45分直播）




首回合史雲斯作客森林悶和○比○，開波兩分鐘後防尼爾泰萊領紅出場，幾乎成場波十人應戰，但森林踢落毫無優勢，史雲斯由史葛冼佳亞領導嘅鋒線更頻頻造成威脅埋門，可見史雲斯實力於對手之上。史雲斯出名主強客弱，今場回歸福地不勝無歸。


森林作客欺善怕惡


睇番聯賽主場成績，史雲斯廿三戰十五勝五和三負，對上一次主場輸波已經係二月頭，跟住八場主場六勝二和，當中包括大炒諾域治、列斯聯同葉士域治，亦以三比二贏過森林，今場雖有尼爾泰萊停賽，而車路士借將前鋒波連尼亦上陣成疑，但仍有足夠實力贏波。




森林季尾及時打番起狀態，但作客後防不穩毛病仍在，季尾最後六場作客共失十三球，今次鬥史雲斯肯定捱打，佢哋鬥勁旅即現形，三月中到四月作客史雲斯、列斯聯同諾域治全部輸晒，想升班睇嚟又要等下季！




賽事兩回合計打和，不計作客入球優惠，即加時三十分鐘，再和互射十二碼決勝。