利物浦當旺主W熱捧

猪拉多纳

15/05/2011


今晚英超「五哥大戰」，利物浦主場對熱刺。紅軍季尾氣勢如虹，「大帝」杜格利殊剛得到領隊長約，加上安祖卡路爾復出，於晏菲路出擊必能延續強勢。相反熱刺愈踢愈沉，領隊夏利列納講明對歐霸席位冇興趣，加上陣容不整，捧主W！（有線201及301台周日晚11時直播）




論實力人腳，利物浦、熱刺頗為接近，但兩軍近況就天同地比，紅軍近期喜事重重，一班主力蘇亞雷斯、古積特、麥斯洛迪古斯都弗到震，成績直線上升，而「King Kenny」剛同球隊簽約三年，更令士氣直上高峰。紅軍從季初有降班之虞，去到季尾如可奪得來屆歐戰資格，對球隊極有意義，所以今戰肯定去盡。目前利物浦領先熱刺兩分，今仗贏波就穩得第五，憑近三場主場大炒曼城、伯明翰、紐卡素勁勢，整定熱刺唔好彩。


熱刺冇興趣踢歐霸


熱刺季尾愈踢愈曳，近十三場賽事贏得一場，成隊散晒。今屆踢過歐聯後，領隊夏利列納公開話如果來屆踢歐霸就不如唔好踢，而上仗不敵曼城後球隊已肯定入唔到前四，故今場有加里夫巴利、加拿斯、贊拿斯、伊高圖等傷兵下，作客晏菲路冇運行。