阿仙奴積弱冇力發維

猪拉多纳

15/05/2011


英超賽事阿仙奴主場對阿士東維拉，「兵工廠」近九周聯賽只贏兩場，爭標希望因而幻滅，球員陣上患得患失冇晒信心，隊中主將法比加斯仍然有傷在身，球隊缺乏領軍人物，即使主場出戰亦未必可以反彈，博「讓球客勝」！（有線202及302台周日晚11時直播）




阿仙奴踏入三月後愈踢愈沉，近九場聯賽只贏兩次，由爭標分子跌落第三，僅領先第四位球隊曼城兩分，隨時連直接晉級歐聯席位都不保。「兵工廠」上周作客史篤城再輸一比三，隊中唔少球員都踢到走晒樣，今周主將法比加斯及拿斯尼未必出得，小將韋舒亞及艾朗藍斯亦未夠班擔大旗，恐怕無力反彈。


維拉對辦受讓有計


阿士東維拉近期雖有主帥侯利亞因病無法領軍，但狀態保持得唔錯，近六周聯賽僅輸一場，演出尚算穩定。維拉兩翼達寧及艾舒利楊格有料到，前線戴倫賓特把握力強，今次作客疊埋心水打突擊，有力撕破阿仙奴條豆腐防線。




翻查往績，阿士東維拉近四次作客阿仙奴只輸一仗，表現對辦，受讓有利下「讓球客勝」值得一試。