楝悉先機：潘頓Ｗ扣錢照贏

博彩老头

　　有一排冇喺文字媒體出現，手痕難當，承蒙《成報》馬經版騰出呢個框框畀我阿棟，發表吓心得。但唔係恃老賣老，賽馬呢家嘢，輕鬆面對最好，如果阿棟啲馬啱大家眼緣，撐吓我，買番一百幾十玩吓，講聲thank you。至於今期開鑼賽，會係正路馬多，但邊個騎師得？我睇唔會係柏寶、韋達，好大機會係潘頓，出馬冇兩巨頭咁多，好在夠「哽」，咪當佢小兒科。

　　第一場五班1200米。「上浦駿將」質素仲係新，去到上季尾先至啱啱熟啲，已經差啲上到名，轉個頭落埋五班，邊有可能唔着數。雖然認定佢係超級馬，練馬師喺賽前冇話托大，做到好夠先嚟跑，睇心意唔似想check場先。而由於上季尾嗰場仲係見佢有外閃問題，呢次1檔有欄傍住實安全，有望先拔頭籌。

　　第二場四班1600米。「喜勝威」上季跑極都係奀仔咁款，呢類細馬唞唞埋埋一鋪，可能會交到最強威力。而如果睇佢上季尾喺呢程點跑，真係把鬼火，套用年輕人潮語，早段hea到不得了，直路又蝕得多，咁都第四，佩服佩服！今次睇佢馬重升番，打得王牌嚟跑，未交代嘅馬，實唔會歎慢板。

　　第八場三班1200米。連「佳同」呢隻不明物體退出埋，「錢照贏」又少隻眼中釘嘞，事關同場要應付嘅剩番「讚賞」，講到速度，兩駒雖然冇同場鍊過，但後駒由谷草過嚟田草，有冇咁勁要受考驗，反而「錢照贏」贏嗰場時間靚，前快後快，今場有1檔亦會攞到欄放，相對形勢好似穩陣啲。仲要呢隻馬應該係好有前景，坐住二班實力，依家在三班孭住118磅嚟跑，筍到暈；至於獨贏，熱就熱梗，但勝在一出閘叫住胡先，未贏先興奮。

點買法

　　今日鍾意潘頓3件， 分別係「上浦駿將」、「喜勝威」同「錢照贏」，由於後駒獨贏冇乜肉食， 一於整條3 x 4獨贏， 中到兩件有微利， 如果順順利利贏晒， 剩係嗰條3 x 1W 都唔錯， 肯定唔只飲到餐茶， 希望幫到大家。喺度亦預祝各位讀者一開波就攞到頭彩。

陳華棟

資深評馬人