洪禮賢講馬：季初搵食靠大摩

博彩老头

　　馬季開鑼進入最後倒數階段，唔夠10日又開咧，餓馬已久的朋友，到時又可大展拳腳，不過都係嗰句，量力而為，成季流流長，唔使急於開鑼第一日出盡力同馬會搏命。

　　或許係行內人嘅關係，總覺得有馬跑嘅日子，時間過得特別快，又覺得充實。而暑期冇馬跑，就算去三兩轉旅行，點磨都仲係8月咋，但係一挨近月尾階段，有一種打到嚟嘅感覺，每日24小時也不夠用，剩係重新溫習功課，睇片、睇賽後報告，已花上很多時間及心機。

　　講到開鑼日，慣性把焦點落在特首盃，呢場一班1200米，有咩馬會報跑，其實已有雛型，而暫時嚟講，邊隻會係擂台躉，估嚟有乜謂，我剩係知道，對上幾屆嘅大熱門，梗係支支咗咗贏唔到，06年「帝聖名駒」廿幾蚊W做阿二，之後嗰3屆嘅大熱連Q都入唔到，一睇往績Ｏ晒嘴，唔通呢屆大熱一樣凍過水？唔想危言聳聽，但起碼大家得個知字。

九月賽績好

　　至於，今季頭段邊個練馬師最靠得住，睇近季成績表，大摩可以視為扶手棍，話晒前季9月累積7W、上季5W（06年則遲至10月開齋！），而睇番上季9月時的上名比例都算誇張，22駒上陣，結果有8駒打入前三名，如果只係計沙田賽事，入到前四名嘅比率仲有半數！無疑， 上季係咁，唔代表今季如是，可能嚟到今季「立」咗油，之但係，傳統上摩廐好少在9月冇嘢睇。

洪禮賢 馬會賽馬節目主持