洪禮賢講馬YIN’S TALK：冇前因 有後果

魑魅魍魉

　　事出必有因嗎？可能係，又可能唔係。正正常常每件事情，總有前因和後果，你想買粒糖，咪要畀錢。你想結婚生仔，咪要同浪子生活講byebye。你想成世人冇乜束縛，咪千祈唔好為一棵樹而放棄森林。

　　之但係，又唔係咩事都係咁正路，某些事的發生，完全諗唔到點解，硬生生咁爆出嚟。當然，是但喺之後搵個藉口唔難，但係咪可以剖析到該件事的起因，又未必囉，與其係要咁，倒不如擺埋一邊，視為偶一為之罷了。

　　冇錯，賽馬係一種實體活動，唔畀亂嚟亦有規條限制點進行，光是關於賽事規例已經有N咁多項，如閣下有時間，上吓馬會網站，剩係「立」吓博彩規例嘅章節內容，單是「定義」那章，係咁意都有10頁。但系統化之餘，由於涉及其他外來因素，至少有人和馬，所以，唔能夠咩都採用一加一等於二嘅公式嚟計算。

戰河第一變包尾

　　好似上季尾蔡約翰馬房的「戰河」，開齋嗰場田草1200米贏到甩晒，彈開「輕輕鬆鬆」及「友利多」超過兩個馬位，翌仗升班再跑該程，只係事隔兩個禮拜，旋即由第一變包尾，仲要輸15個身位過外返嚟，完全唔似同一隻馬。

　　睇番賽後報告，蔡神仙亦未能解釋差劣表現嘅原因， 隻馬check過，又唔係健康有問題， 一隻孭咗WP接近8球嘅馬就咁輸咗。唯一可打圓場，正如韋達賽後所言，咪就係唔妥囉！？

洪禮賢　馬會賽馬節目主持