洪禮賢講馬YIN''S TALK：文靜＋淡定未必好

博彩老头

　　制定任何標準，去衡量事物，係正路做法，但過分側重的話，單一化去評估，唔曉得去變通， 偶然也會出錯，像馬匹行圈時的舉止，不會千篇一律吧，Ａ駒亮相時文靜又淡定，或是跑得好的先兆。

　　但套用在Ｂ駒身上，出來的成績未必如一，以為收斂係好事，查實跑完至知佢係「死牯牯」的模樣咋。

　　有些馬生性係咁，成世都冇得點變，像退役的伍廐馬「權勇駿」，服役5季以來， 經常都會在閘前攪攪震，以及鬧脾氣，並會有出閘慢半拍的習性，兩歲嗰時係咁，上季退役之前咪又係一樣，係都唔變，贏馬時係咁，輸馬亦都係咁，你真係吹佢唔脹噃。

　　又例如上屆打吡盟主「極品絲綢」，初出在田草1400米跑第二，輸畀「喜勁飛」一役，唔覺臨場好多汗，又唔覺佢有跳跳紮的舉動。點知翌仗轉到谷草（初跑），未出跑道之前，情緒已經有點神神哋，落到草地直情成身「令」晒，啲汗多到好似啱啱跌落水咁款，嘩，如果當時未買佢，落到草地見到咁嘅款，一定唔會「拔鎗」，但「極品絲綢」在出閘失利情況下，拉士仲可以贏到收韁，服晒。

隨時諗多咗

　　而佢嘅廐侶「藍天」，情況亦差唔多，通常跑得好嘅時候，賽前行圈嗰幾分鐘，都唔可以用文靜或淡定嚟形容佢， 總會喺佢身上出現輕浮、唔定或多汗等等。反而，有時睇佢行起上嚟乖乖哋，以為冇死，夠晒淡定又收斂，係進步嘅表現，結果係諗多咗囉。

洪禮賢　馬會賽馬節目主持