洪禮賢講馬 YIN’S TALK：沉醉易變沉溺

港陌

　　沉醉好容易會變成沉溺，一旦對人物、事情抱着過於樂觀的態度，往往都會不能自拔，判斷出錯而不作修正，可能產生唔同程度嘅下場，普遍嘅損失泛指「時間」膽拖「金錢」和「心機」。如果係痴心錯付，遇上一個不該遇上的人，上述3樣傷害自不然冇走雞，注定慘淡收場。

　　假如對象由一個人化為一匹馬，情況咪又係一樣！沉醉該駒的往績，偏偏佢「毫無表示」，跑極都係冇咩成績交出，一場又一場，白白浪費金錢及希冀，唔懂得cut lost，嚟到季尾回頭檢討自己的投注對象／策略，先至發覺係一場遊戲一場夢，不禁呻句：「有眼冇珠！」

吉祥三寶輸怕人

　　先旨聲名，以下嘅例子只係季度性，上季係咁，並唔代表今季如是（當然唔係冇機會依然故我啦）。譬如「藍老虎」及「吉祥三寶」，去季跑極都係水準以下，尤其係後駒，更加未試過跑到十名以內，如果以為佢哋評分愈減愈低，咦，有着數噃！不斷重複又重複催眠自己，係咁畀機會，去到尾先知係咩一回事，謎底打開原來⋯健康曾有問題（兩駒夾埋嘅病症計有腳痛、氣管有血、關節炎等等），那一刻才恍然大悟！

　　目前上述兩駒相同之處係評分俱創新低，佢地有冇本事從低位裂口高開，重上昔日盛時作戰水平，真係唔清楚？！

　　只想帶出每季都有類似嘅例子， 何時要死心，作出止蝕嘅舉動，某程度上係寧早莫遲。

洪禮賢　馬會賽馬節目主持