洪禮賢講馬YIN''''''''S TALK：揀馬似捉迷藏

猪拉多纳

　　或許賽馬是一場賭博，亦可視作體育活動，亦疑似投資工具，又可以係捉迷藏遊戲，睇吓各人站在哪處去睇而已。如果喜歡鬥智的馬友，有機會覺得似捉迷藏，因為你一定要捉到人（頭馬），先至會贏（錢），搵唔到的話，只係嘥時間、嘥心機（又嘥錢）。

　　實在要揀中1隻頭馬會有幾大難度？擲骰仔會中，有咩奇。求其問家中小孩，亦會噏到個幸運號碼畀你。再唔係，就貪口爽，1場1；2場2；3場3拖1，2，咁揀唔通冇得中咩！但完全偏離正常軌跡思維，失卻玩馬樂趣，如果真係採用上述3種方法揀馬，建議大家早啲收手罷啦！

　　捉迷藏，乃鬥智鬥耐性遊戲，你喺某處「捕」佢好耐，偏偏人哋唔出嚟，白等！情況亦像你揀了A駒某一場嚟下注，結果冇影，翌仗到你死心，A駒就跑出嚟，呢種陰錯陽差的劇情，你與我親自擔綱主演，何止一萬幾千次。

先定大方向

　　要「捕」一匹馬，應從何處入手？狀態、血統、配件、路程、配搭、檔位、班次、場地等等，你喜歡的話，全數收納作篩選條件也可，亦可隨個人喜好，在篩選條件之中，增減不同的項目，又如馬重、賽道之類。總之，整合出自我的基準，起碼有個大方向，要「捕」，都有個譜。

　　據知，賭馬集團就是將各項他們認為有用的因素逐一評分，在比較各駒所得總分之後，定出投注目標。當然，有啲項目評分高低取決於人為判斷，無劃一準則。

洪禮賢 馬會賽馬節目主持