洪禮賢講馬：贏得輕鬆隨時失蹤

港陌

　　不是小心眼，或者存在過於主觀嘅思想，但每見馬匹無故大勝之後，總會帶點先入為主的心態，劃上一個問號。

　　當然，昔日「精英大師」17連捷，陣上甚少有對手可以埋到身，又或是一季7捷的歷史創造者「盈彩繽紛」，7W之過程當中，根本沒有對手有辦法迫近，但此類百年難得一見嘅事例，可曾會一季上演多幕，有較高賽馬年資的馬友，也會知道這類情況不會多。

　　馬匹陣上無故大勝，除了真係實力異常超級，冇辦法掩藏到自己嘅優越地位， 如當年「蓮華生輝」、「精英大師」，馬王在第四班起步，跑快啲都贏成條街，天生麗質難自棄嘛。

　　但另一方面，此類大勝而回的鏡頭，或多或少係騎者情願贏遠啲至算，因坐騎未必可在比較托大嘅演繹手法下勝出，恐怕如果稍為輕率，要等待再贏嘅機會不知何時了。

天下寶好例子

　　撇開無故大勝之馬，是否在贏馬前後有何不妥，真係啱啱遇着剛剛才贏，或甚麼條件之下勝出也好，總之跑唔番的事例多的是，去季如李廐「天下寶」，季初夜賽贏馬一役，不論締速及姿態都係好有說服力， 四班1650米造1.39.9秒，末段22.68秒，總時間及拉士締速都更勝同晚二班頭馬「創佳績」，但埋單計數，「天下寶」全季就係得1W，大跌眼鏡嘅馬友（如我），我諗人數之多，由北角排到沙頭角都可以。是故，贏得輕鬆就等同繼續Follow，似乎未必囉！