馬主論戰

魑魅魍魉

任達華：揀得正見真章

　　今日沙田煞科戰，繼續吼冷馬捧場，睇吓可唔可以標個尾會。先推介第十場「揀得正」，前仗響田草1600米力撼「太平星」、「納帕二號」上名，肯定仲有分在手，上場跑黏軟地輸咗，唔使太過介懷，今次跑番正常場地隨時見真章。

　　另外鍾意第三場「勵盈」，前仗贏五班賽，末段走勢有如天馬行空，上場跑番四班賽得第五，走勢亦唔失禮。始終以往響三班贏過，若然跑出水準，喺呢班一啲都唔輸蝕，七歲馬回勇肯定用得就用，可博。

張敬山：冷敲電訊巨星

　　苗禮德剛啱中三元，其中「朝東之星」、「高飛飛」都有分頭，證明呢個倉口嘅冷馬唔可以睇小。今日我哋隻「電訊巨星」又上陣，馬房搵嚟薛順強操刀，臨場肯定會有賠率，四歲馬始終質素尚新，唔一定冇得跑，即管睇吓薛順強掛靴之前，能否贏番場頭馬喇﹗

　　另一匹心水係第三場「信賴」，近九仗只係得一場冇獎金，演出真係夠晒準。最重要係同杜利萊夠合拍，今次繼續交畀佢操刀，同場對手似是而非，話唔定可以響度贏番一場。

梁廷鏘：活力至寶值博

　　大摩今日手馬好惡，一於從中揀選捧場對象。最啱心水係第九場「活力至寶」（圖），雖然同場有匹明星馬「川河勁駒」響度，但計質素前駒未必輸蝕，尤其係跑番沙田，應該更加啱呢匹大步馬發揮，估計臨場獨贏賠率唔會太乏味，值得一博。

　　另外第八場沙田一哩錦標，大摩出兩隻，以「醉味」較啱心水。前仗已經贏過晒「喜聚寶」同「競駿精英」，秤卡士唔會輸蝕畀任何對手，上場不敵「步步穩」唔係主力所在，今次可以擔正。