洪禮賢講馬：勁勇士未到頂

魑魅魍魉

　　近七期騎師王，唔係柏寶就係韋達，後者更佔大多數，呢次佢又係Set到得十幾蚊，阿寶有成５個開，隔夜賠率的局面，其實與上期冇大分別，唔通又係大炒格﹗﹖進一步拋離柏寶﹖

重心場次

第2場  第四班（60-40分）1650米

　　雪山神駒　歸隊後跑了兩場，愈來愈有走勢，如果上賽拉士肉緊多少，其實已經有Ｐ，既然持續見好，而韋達又擸番策騎權，似乎目標在今場﹔計目前分數，比上季第二Ｗ還要低，根本冇壓力可言，如非10檔影響過大，唔贏都應該有Ｐ。
   
　　「再度豪情」縮回一哩會更好衝，而話晒季內此程曾負於「蓋世子牙」、「靚到爆」等實力馬，級數在此夠爭。
   
　　「神州穿梭」長期有分在手，但長期有腳患。「幸運來」剛仗有拖，已指出進步在於陣上走規，而幾乎贏埋已顯示出轉變後的威力，原本上番四班也不怕，要驚只係呢對騎練的往績（上季至今0:14）。「回鄉精神」唔明點解上場衝刺力不如前仗，係早發力了，還是前仗係符碌之作，呢次應有更深了解。「寶石王子」匆匆再出，而突然在配件上有變動，或是變身的引子，實在上場陣上又真係冇之前咁嫩水。「福到財星」唔係大外檔會拖多一次，因上場係塞車影響而已。

第1場  第五班（40-0分）1800米

　　康樂名駒　連續3場冇Ｗ有Ｐ，縱使上賽慳晒返嚟都只得季軍，至少證明兩Ｗ後仍未心足，呢次再於相同路程上陣，仍具威力。「廟豐泰」終於展示出情緒稍乖後的成果，估計會繼續好。
   
　　「喜相逢」有本事打低「浪漫添馬」，只加5分，冇理由有阻力。「大將風騷」若以剛仗頭馬水準，又係冇可能會畀加5分影響到戰鬥力。「彩旗飄飄」以為只得前置一道板斧，原來後上亦得，出現增值能力，要追。「飛躍星河」及「足球大師」納於邊線。

第3場  第四班（65-40分）1200米

　　如願以償　兩Ｗ愈贏愈輕易，67分起步何其着數，畀佢落埋四班跑，除非谷草性能差到嘔，若不，邊有對手夠佢咁惡。「威皇鷹」對上幾匹同主馬，全部喺首季有Ｗ落袋，有幾急進可知，而此駒亦係做得妥妥當當才上陣，仲試埋谷閘，有理由相信初出即搏。
   
　　「帶利財子」上場臨場亮相明顯唔夠Sharp，入Ｑ全靠1檔，或許今場仍有此優勢。「歐洲動力」幾好款，兼初出已有走勢，大冷在此。「日月暉華」 1000及1650米試過晒，亦有不錯表現，肯轉到此程，或會更叻。「大把在手」10檔擔心頂在外叠﹔「質超駒」工夫完整性一再受傷患影響，俱可爭不穩。

第4場  第四班（60-40分）1650米

　　奄尖大少　上賽擊敗「再來旺財」的過程輕易，以目前銳勢，在此班好惡，如果負磅能力不太曳，有權再Ｗ。「駕馭」整體條件唔比近仗失色，換番黎海榮可能仲好。
   
　　「有景」上場1200米擺明嫌短拉士唔斷算叻，上一哩而遇到一場未必有步速的環境，可能賺到形勢。「睡得好」實力見盡，就算跑啱路程，在四班最多值中級，拖腳唔反對。「大東海」若然做番啱留放，隨時放到。「尚感」加罩即變身，但轉場後的環境完全唔同晒。「常山鎮寶」堅持分數減過籠，大冷可敲。

第5場  第三班（80-60分）1000米

　　勁勇士　連續3W，以為評分升幅有待消化，但見上場仍可入圍，如果唔係出閘失靈，或者會更近，但證明到目前分數未到頂﹔估計今場有好檔仲好跑，倘133磅孭得起，有力4Ｗ。「讚賞」靚仔好款，但本身有脾氣，只要臨場情緒冇問題，初出已夠爭。
  
　　 「此時此刻」太重磅，未必讓得起前兩駒。「同心威駿」檔好，應會用番最佳跑法，成績或止跌回升。「常山鳳寶」贏開，拖腳尚可。「皇帝出巡」老了力短，谷草 1000及1200米最啱，有埋好位，爭三三四四。「星光活力」對住幾匹快馬而自己排了外檔，唔易於早段泊位。

第6場  第三班（85-60分）1200米

　　清風送爽　今場形勢比對上兩場好得多，令爭勝本錢增強。「開心動力」向來演出有保證，就算加分後略有壓力，仍是正路腳。
   
　　「最佳孖寶」剛仗有番該有的纏鬥力，雖則埋唔到尾，但路程係1600米，唔夠氣量正常，呢次肯縮程啱數。「紅褲子」上場或因馬鞍滑移影響，計番再之前賽事中的表現，可拖。「賞蝦王」冇檔，不易跑得好。「三和之星」和「戰士」略有卡士，但俱因跑法太被動，未必追得切。

第7場  第二班（100-80分）1800米

　　國中之星　負重在二班非具壓倒性優勢，不過，此場好多對手冇甚根據，又或是近績普通，加加埋埋才覺得佢有冠軍相。「好開心」降班、路合、檔好等等，條件亦算ok。
   
　　「零距離」轉馬房第二回合已有番走勢，似乎除晒配件才是正路做法。「雄風」啱啱搏輸係騎者直路處理有問題所致，希望汲取經驗後，發揮會有所領悟。「快人快語」和「錢程萬里」跑法一樣，級數則後駒好啲。「易搏贏」匆出跑1800米，其實沒有多大把握。

第8場  第三班（80-60分）1650米

　　旺家多寶　跑啱晒，慳埋位，但上場只得殿軍，成績唔滿意，究竟係技窮還是隻馬鍾意外叠衝，今場應有答案。「銀太陽」用到柏寶，估計對發揮幫到幾多。
  
　　 「多贏勁駒」可能因地慢令近仗表現失色，呢次正常場地而路程又啱，再畀機會。「歡騰」在四班可以沿途蝕住照贏，但轉了此批對手，再蝕未必讓得起。「威力高」已指出前仗係賺晒才入Q，本身在三班根本好下風。「紅跑車」或受惠今場利追的形勢。