洪禮賢講馬：超力駒再接再厲

魑魅魍魉

　　來來去去，唔係韋達就係柏寶，佢哋兩人已經包辦近六期騎師王，而今期前者在騎師王set到得十幾蚊，意味着佢嘅坐騎好多胡叫。此外，兩位小將蘇狄雄及梁家偉，都有唔少餐士。

重心場次　第4場　第四班（60-40分）1200米　泥地

　　風陵渡三班周不時要捱打，落番四班則也交也武，始終今季4場班內同程，有本事攞到3條Ｑ並唔易﹔等到落班即用小將減低負荷，有運抽埋2檔，配合到佢略主動的跑法，應是黃金機會。
   
　　「新薪」之後有谷草1200米唔報，硬係要嘗試跑此程，或許之前泥閘試得好使然，姑勿論咩原因，如果適應到，加埋本身有班底，重磅亦有得爭。「萬人迷」冇晒辦法之下，上場轉泥試吓，結果幾乎有Ｐ（如果騎師騎埋拉士一步就有﹗），似乎試到新出路，呢次換人及檔靚，應會再搏。
   
　　 「盈驥」前仗賽前有撻細閘，結果初跑同程也有Ｐ，而上賽前並無此安排，加上全程外叠頗氣餒的處理手法，唔輸才怪﹔今次賽前有番細閘，仲排到1檔啱放，或會放到。
   
　　「全德勝」上場轉馬房初出表現失色。「實業輝煌」驚12檔帶唔到頭。「當旺」今季在四班成日受氣。「京城孖寶」終極目標或是煞科五班谷草1200米。

第1場 　新馬　1400米　草地

　　陽明飛飛一而再追唔切，嘗試加程合理，亦好大可能即刻適應到，總之計進度及級數，在此數一數二。
   
　　「獵豹小子」至少要跑此程，方可交到應有能力，而上賽輸得較遠，與出閘勒住好大關鍵，特登轉用阿滇，或會唔同晒。「軒轅勇將」及「天外之天」跑來跑去仍然係前列常客，正路腳。「瀟灑福星」又係至少要跑中距離才會好，肯加程唔好睇小。

第2場 　第五班　（40-0分）　1000米　草地

　　時時有機贏了班次、跑法及檔位形勢，加上賽績持續見好，膽材。「野馬」及「放縱」原本都係臭脾氣馬，一隻亮相通常會發癲，另一隻喺陣上自己易跑錯，不過從大閘走勢看來，兩駒的毛病改咗唔少，呢類冇咩傷病之馬，一轉款隨時話嚟就嚟。

　　 「莎朗之寶」及「辣得喜」都係短癮馬，縮程有好冇壞。「神力金剛」唔係氣管有事，一早上到名，落班則好着數，但跑得好與否，要博。

第3場 　第五班（40-0分）　1600米　草地

　　太平洋剛仗身處全日不利後追的田草賽事，自己陣上又賣大包（直路彎掟到出十叠以外），仍可追到第六名，唔算太差﹔假使今場有幾駒肯帶，佢留留埋埋衝一段的跑法夾晒。

　　 「浪漫添馬」大意失荊州之後，用番馬偉昌，表明了再搏的立場。「安競」上賽前大閘唔吸引，陣上卻好犀利，睇嚟轉倉後能力升值了。「國家富強」連谷草 1000米都輸近，又係轉馬房後重生。「活力威」如果獨自領放，此程亦得。

第5場 　第四班（60-40分）　1400米　草地

　　飛躍之鋒加罩及綁脷後，即於上賽入Ｑ，輸畀大超班馬冇得好講﹔配件試啱後，再向此程出發，理應更具殺傷力。「曉勝駒」忽然跑番好，難定是否偶一為之，但論分數，則一早減到過籠。

　　「雙龍出海」如果冇馬鬥搶，10檔唔難切入放頭，苟如是，或有Ｐ望。「聚有盈」上場慳慳埋埋才有Ｐ，呢次8檔唔易有夢幻形勢。「雄爆」純粹內檔才考慮，因本身演出極失準。「愛蓮說」大幅縮程，略有戒心。「中國好」長期追得吓，但又唔入三甲，冇馬再揀才會勉強拖一注。

第6場 　第四班（60-40分）　1800米　草地

　　長春樹連仗跑得唔錯，而上場梗頸四則是騎者取位不妥當所致，希望今場有韋達幫到手。「勁擊」終究是班內長途中堅，加上近績穩定。

　　「壽比南山」操住嚟等，並唔係唔操得才遲遲始復出，儲夠體力的話，條件四正。「暖在心頭」贏馬姿態誇張，唔擔心回到四班會冇碇企。「健康藍莓」守好位跑法，在今場前中段或會慢的場合，可能乘虛而入。

第7場 　第二班（100-80分）　1650米　泥地

　　至勇飛龍夠噸位、跑法有彈性，同埋排1位，統統係利好條件，呢匹新勝馬縱轉場也不要輕視。「卓爾非凡」級數稍秤先，但賠率過熱只宜作配。

　　「玉峽生輝」上賽前試泥閘留下好印象，唔排除今場才是目標。「披星戴月」休出跑了三場只係輸近，演出略失望，這次轉場畀埋最後機會。「易搏贏」要跑一哩路程就只得此場（谷草冇晒），係咪焗跑都好，以佢勢頭，勿看輕。「喜威寶」試閘拉住仍湧住去，印象挺佳，而季內三次跑此程得ＷＰ（另1場跑第五），部署方向明確。

第8場 　 第三班（80-60分）　1600米　草地

　　神風先驅段段有的跑法，置身今場或會受惠，同埋，休後第二回合應更有威力。「飛快勇」只怕步速唔利追。「龍的傳說」嘗試縮程或係好事，情況一如廐侶「至勇飛龍」。

　　「智友」剛仗多阻滯（馬鞍滑移、割傷等等），敗不作據，當然，今場用番柏寶令負荷增加，唔係冇影響，並非壓倒性優勢。「馬主精英」終於除去冇用眼罩，如果之前腳傷唔係影響進度太大，隨時返嚟。

第9場  　第三班（80-60分）　1200米 　泥地

　　科研精英排好位在發揮上會差天共地，有埋2檔起步，幾可肯定可搶欄領放，倘步速拿捏得好，可放返。「勁飛馳」小將減輕負荷，由失利變番有利，而話晒手上已累積兩場三班頭馬，實力必夠爭。

　　「心歡笑」經常令人失望，只宜作配。「聖迪達」及「時時攞彩」磅位稍重兼排檔普通，充其量爭位。「神殿」如果步速扯得快，則佢會着數。

第10場  　第一班（110-85分）　1000米 　草地

　　紅衣司令路程性能不如「萬事佳」，不過級數則唔會比下去，而根據往績顯示，休出第二回通常會好，十幾倍Ｗ值得敲。後駒直路賽點叻唔使再講，當是爭勝要角。

　　「明燈」好開唔難保持。「福勝滿載」剛仗能勝前駒，純粹係對方走錯位所致，呢次再遇而大家排位有別，不可再了。「開心歡笑」贏卡士，尤其今場係冷門，更要留神。「寶樹友盈」只負115磅，在此唔會冇得揮。

第11場 　 第三班（80-60分）　1400米 　草地

　　超力駒唔等降班，立心在邊緣分數博人唔信，既然一再於弱項上到名，今次回到主項，機會更高。「國寶」休出即刻贏到，難度幾高，當然值得尊重。

　　「駕寶」終於證明到此程仲啱追，叠埋心水唔轉程，再追。「談笑用兵」冇內檔優勢，不易交番出上場的水準。「如日方中」落腳慢，加程合理。「高一線」唔係排大外檔，必揀。「好有勝」上仗直路搵位論盡，換小將其實仲好，大冷在此。