馮諾嘉手記：高明威威夠料冧莊

魑魅魍魉

　　今日十一場泥草混合賽，最矚目一定係頭場新馬短途錦標同第八場香港賽馬會社群盃，頭場出馬只得四匹，不過大家都係志在睇「盈彩繽紛」同「美猴王」單打獨鬥，仲有前駒可唔可以七連霸。至於第八場，噚日「勇將軍」同「駿綵」退出，得番六匹馬角逐，兩個盃都係馬少場合，賽果會唔會更正路呢？

　　近日沙田頻頻落雨，場地當然受影響，草地可能跑好至黏地，泥地則有機會跑濕慢地。天文台預測今日會有幾陣狂風雷暴，揀馬不妨先留意擅跑變化地嘅馬。精選場次第五場四班1650米泥地，用「高明威威」做膽，上場贏田草1800米，後上追勢凌厲，證明潛質唔曳，前次則喺田草1600米黏地跑第五，實際只距頭馬個半馬位，既然淋地同一哩都證明過，轉戰泥地強配韋達，應該有條件再贏，做膽。配腳方面，先揀連仗同程入位嘅「八發八中」，其次係季中贏過呢程嘅「飲水思源」，揀多匹「卓爾不凡」，班底高兼泥地一哩路程首本。

高歡形勢唔曳

　　第七場四班1400米草地，「高歡」上場跑同程，同今次一樣都係排十一檔，大部分途程走二叠，只係以短馬頭位輸畀「松風」，無疑快步速有助，今場亦有「瀟洒靚龍」擺前走，場地冇太大變化，應該可以收復前失，做膽。配腳方面，老馬「勵盈」上場喺五班贏同程，末段交出快時間，今場上班負磅減輕，拖腳首選。「漸信良駒」近兩仗都喺柏寶胯下大熱搏失，今場換鄭雨滇求補中。「聚有盈」前次同程入位，上場敗於前段二叠競跑，走位亦唔順，計馬要兼顧。

　　第十場三班1600米，柏寶同方嘉柏呢對組合上周日威到盡，今日田戰唔係佢哋嘅主場，方廐出戰馬都少好多，前日「十足十」退出後，今日騎練合作得番呢場嘅「一言為定」，既然呢對拍檔手風順，而且呢匹馬上次在港第二仗已大熱贏馬，後上追勢勁，今場上三班改由柏寶操刀，爭連捷信心更大。「普梳王」連場喺谷草落敗後，突然跑番田草，配腳首選。「高手」同「勝利飛駒」近仗走勢都唔差，可以拖埋。