馮諾嘉手記：波馬賽果 唔容易估

魑魅魍魉

　　近日無論跑馬或世界盃都出現一啲令人意外嘅賽果，先係上次谷草日賽方嘉柏同柏寶齊齊贏六場，前者平咗35年前練馬師張學文所創下嘅紀錄，後者則創下騎師一日內六捷嘅紀錄，賽前唔係咁容易預計到。而前晚舉行嘅世界盃賽事，葡萄牙居然大炒北韓7﹕0，都唔算太正路，話晒後者之前對巴西都頂得兩嘴，估唔到今場竟然會變咗魚腩。

　　周日沙田舉行新馬短途錦標，睇完報名表後相信大家都有少少詫異，皆因呢場賽事只有四匹馬參戰，而原先更只係得「盈彩繽紛」同「美猴王」兩駒報名，其他練馬師見到呢兩匹馬報名都已經卻步。最後要到延遲截止報名期間，先見到李易達安排「皇仁勁駒」同「好精伶」兩駒報名參戰。

　　計牌面，李廐兩駒當然難睇好，但由於跑入前五名都有獎金收，佢哋都可以穩袋一筆獎金，計落除笨有精。所以小妹都有啲奇怪，點解其他練馬師唔嘗試幫旗下馬報名呢﹖話晒仲有一個可攞獎金嘅名額。

　　「盈彩繽紛」至今六戰六捷，加上身負打破七捷魔咒嘅任務，機會應該稍勝「美猴王」。不過，近期波馬賽果都有少少冷味，呢條死Q係咪可以開出﹖都要跑過至知。