洪禮賢 講馬：績靚馬成糖衣陷阱

魑魅魍魉

　　劇情發展往往係出人意表，像大多港人至愛球隊英格蘭，在世界盃首回合同美國1﹕1打和，滿以為第二回合演出有突破，結果係對住阿爾及利亞都冇波入，最終同對手0﹕0再和一場，死未﹖﹗

　　話題帶到馬事，騎師冠軍之爭亦有類同情節，之前柏寶並無因韋達停賽而係咁贏，三四期只贏兩Ｗ，但一到後者停賽復出，啱啱嗰期可以創造歷史攞夠6 場頭馬，真真正正贏到冇人信，如果唔係，「發達心聲」邊有可能仲有十幾倍。所以大奇蹟日唔一定只係在股市出現，馬場亦時有﹗

走得快好世界

　　來到尾聲階段（其實不只講過一次），跑咩欄，什麼田草、谷草，或檔位好壞，總之唔擺前走就係蝕，只要睇睇近兩期田草，和剛啱谷戰的頭馬沿途走位，呢點冇得拗。當然，若像日前第六場賽事，放頭嘅「愛蓮說」同「世世無敵」拍住鬥燒，令頭兩段好似跑1000米咁扯快，又點會唔係後上馬天下噃﹗所以，嚟緊田草B欄賽事，如果頭兩場又係咁嘅模式，之後中場再經壓地，前置馬更要秤高啲。

　　季尾揀馬比季頭或季中都要難，績靚嗰啲往往係陷阱，撇開日前「旺舖福星」由3Ｗ變尾三（因賽後驗到有痰），又或是準到痺但唔啱路程嘅「我跑得」，當中仍有好些馬匹，因建立了一定養眼的近績，來到季尾根本唔夠體力，陣上可以話冇就冇。

　　反之，有些馬匹在季尾才見好，但礙於近績欠奉，賠率往往出現高水，像日前「齊鼓掌」、「好著數」便是好例子，前駒臨場為11倍冷門，後駒賠率更冷落至30倍，完全乏人問津，結果均能殺入三甲。當然，呢類馬如果追過幾次都唔得，梗係要忍痛分手。