賠率有路捉：福至心靈睇飛有計

魑魅魍魉

　　第二場四班1650米，「福至心靈」大前仗閘前票如雨下，由35倍打到17倍入Q，所以最近兩仗都成為熱門馬之一，不過演出都係令人失望，而且佢谷草一哩冇根據，後上馬跑法又被動，加上連續兩仗輸怕人，照計應該冇乜飛至啱。不過噚日早飛，居然企硬 58蚊次熱門，位置21蚊，好明顯有人隔晚落定墊底飛。

　　雖然飛數嚟得好突然，但睇番勞愛德似乎好重視呢隻馬，復課四課快工夫一手包辦，好明顯有殺着，絕非冇迹可尋。既然騎者摸到實，早飛又非常對辦，小心呢場至係出擊目標呀。

仔仔女女位置票勁

　　第七場三班1000米一大批路程專家在陣，但係「仔仔女女」位置只得26蚊明顯偏熱，呢隻馬上仗初出冇影，今晚只係配薛順強，位置早飛居然仲勁過「祥禎」，拍得住「喜萬家」同「勁勇士」，好明顯唔係普羅馬迷買落去。睇番佢同父馬「點心」同「賀喜」都係谷草特佳，相信佢亦唔會例外，有冷味。

潘頓惡馬多

　　騎師王方面，潘頓近期手風好順，今晚手握「浪漫添馬」、「中環英雄」、「駿蹄飛」、「金碧亮馬」四匹實力馬，再加埋邊線坐騎「金剛驃」及「應變計劃」，抵買過柏寶同韋達喎。

周仲