洪禮賢講馬：好利利超級

魑魅魍魉

　　柏寶上期１Ｗ都冇，「美猴王」更連Ｐ都冇埋，擁躉實喊到收唔到聲，呢次會唔會做番齣好戲﹖成數都幾大。至於另一個要重視嘅騎師應該係何澤堯，出馬算多，仲有唔錯分量，兩場Ｗ應冇走雞。

重心場次

　　第7場  第三班（80-60分）1600米 草地曬冷王從賽事中見進步，因上場不只出閘反應敏捷，連帶拉士衝刺時，再冇之前斜跑的毛病﹔跑夠終肯加程（外地一戰此程即勝），大摩行得呢步，表明了求勝決心，而隻馬由於有輕磅之利，唔擔心會冇得揮。

　　「納帕二號」上場臨場氣色麻麻，又隔得耐冇跑，依然有Ｑ，忠心大過天，而經重新開氣後，一定更勁。「太平星」唔係爆缸，應該係坐住二班馬，呢次唞夠又做番足才動身，冇理由只求熱身。「傳奇快車」剛仗表現比預期差得多。

　　「飛快勇」近仗演出極度反覆，但明明上次1400米跑得好哋哋，硬要加程，或是上賽末段遲撻着的關係，分利馬有分頭拖吓無妨。「雨電風雷」步速如夠快，才有競爭力。「智友」上場贏得險，係評分漸盡，還是地慢，很難一概而論，但只負121磅在三班則好着數。

第1場  第四班（60-40分）1200米 草地

　　好辣椒及「好笑容」各有隱憂，前駒實力普通，放唔出就冇梗，後駒上賽那個殿軍唔係證明咗好多，不過一對馬處身此組，又好似高多少。

    　「一路奇兵」終等到佢唔跑谷草，話唔定一轉場即掂，始終上場已見走規好了不少。「厲行星」唔叻，卻有好檔幫手，Ｃ欄2檔或有so。「寶貝」外檔唔易克服。「紅旗輝揚」排番內檔跑短途，係咪高估了牠，今場有答案。

第2場  第五班（40-0分）1800米 泥地

　　乘風破浪泥地最啱，尤其跑到長途更甚﹔上賽可以連田草也入Ｑ，近況可知，膽材。「荊山玉」目標在今場，故上賽之敗不用考究，總之場地正常，佢就會有得追。

　　飛躍星河」和「大隊長」，有級數但因重磅或排外檔，令機會失色。「煇煌駒」未知回夠氣未，但檔靚及地利，已是不錯的本錢。「將臣三號」與「魅力影子」遇冷可拖一注。

    「利之寶」置身五班，減到落呢個分，一定有so，不過近況普通，亦擔心唔係蘇狄雄可以發揮出水準。「野蠻」季初仲入過Q，但之後仗仗演出差，九歲馬明顯退步，無謂憧憬。

第3場  第四班（60-40分）1800米 草地

　　光芒四射唔係小將可駕馭得來，所以近仗才會一再出現近而不入三甲的賽績，終於執正番配搭，又到郁手之時。「福到財星」好早已指出係長途料子，一日唔跑1800米或以上，唔會展示出最強能力，呢次肯嘗試係好事。

　　「神州八號」及「高明威威」上次1600米同場而齊齊追得好，加程一試或有更佳發揮。「呼風喚雨」曾傷腳，要博好得番幾多﹔「經典能量」要有形勢夾晒才跑得好，亦係有風險。「好旺財」實力見晒，勝在輕磅及當弗。

第4場  第四班（60-40分）1600米 草地

　　勁快耐冇出，一樣跑得好，賽績有驚喜，而由於之前兩個月冇跑，儲備大量體力，來到尾聲幾吃香，熱完身即回到勝途，應會更惡。「喜綵」終於在上賽重現該有的能力，贏開加磅唔算多，要追。

　　「越跑越有」整體演出失望，兼且路程轉來轉去，唔知咩心態﹗「再來旺財」此程會比1400米啱，有埋1檔教埋小何點跑，就算唔易贏，卻有望上名。「金滿城」唔係排外檔，唔係冇贏馬機會。「濰坊」季尾係跑起了狀態，但目前40分，唔知取向如何﹗﹖

第5場  第五班（40-10分）1400米 草地

　　勵盈如果剛仗直路唔係要一路外移搵位衝，好大機會有Ｐ，一落班即有表現，反映優勢幾大，既可維持正常出賽頻率，應不會突然走樣。「算得妙」冇咩板斧，只係好位及跑法主動，對住一大堆普通對手，或可放入Ｐ。

　　「創先機」今季1400米長跑長有，只要呢次外檔唔係蝕到暈，冇Ｗ有Ｐ。「神機妙算」3月中曾停晒工夫，但近期準備做足番，邊線馬。「賞心」一連兩場跑法太進取也輸得唔遠，若今場執正番跑法，隨時變身。

第6場  第四班（60-40分）1400米 草地

　　一言為定初出走勢比預期好得多，仲要當時陣上多阻滯，匆出而肯在路程上加以配合，似想早贏早着。

　　「新領袖」贏完之後成績退步了，慢閘係主因，但話晒佢係今場少數季內識贏嘅馬，要尊重。

　　「好小子」轉到此程後演出穩定下來，正路腳。「偉感」開竅後上番四班也未必會唔夠跑。「同歡笑」和「信賴」唔係冇着數，惜排檔不利。「聚有盈」上賽季軍的水準值得商榷。

第8場  第三班（80-60分）1200米 泥地

　　天久外地有膠沙實戰經驗，賽前仲特登試課泥閘，如果跑落唔適應都冇得好講，論能力，二班都應該有得跑，仍在三班梗着數。「時時攞彩」升班贏得更易，完全體現到收斂後的威力，冇咩好挑剔。

　　「時代明星」和「聖迪達」內檔幫好多，有力爭入前列。「勁飛馳」磅頭愈來愈重，壓力隨之而來，限爭三三四四。「神殿」班次失利，頂多位置。

第9場  第三班（80-60分）1400米 草地

　　好利利加程贏到好似晨操咁輕鬆，姿態嚇人一跳，如果唔係14檔影響過巨，就算重磅，贏面依然大。「騰雲駕霧」只擔心近十日八日冇快跳工序，計馬在三班只負123磅，甚有殺傷力。

    「蓬萊仙子」視乎形勢才可發揮威力，但今場早段未必快，可能追唔切。「勝利飛駒」跑番正常場地的話，威力必比上賽更強。「駕寶」加罩試閘走來自動波，觀感比上賽前那課自在，所以唔好介意上場冇影，或者一加配件即到位。「追月」跑得好都係爭P居多。

第10場  第二班（95-75分）1600米 草地

　　卓爾非凡回到此程會比1800米強，用小梁減輕負荷令競爭力更大。「歡呼星」加罩後，未試過冇Ｐ，一日未斷纜，仍要尊重。

　　「非常好」剛仗騎者演繹手法唔理想，結果一樣湧得唔錯，呢次在路程及配備上有變，唔似等消案。「紅跑車」上賽與前駒同場，又係追得幾吸引。「綠色至尊」試閘有兩腳，外地績亦唔失禮，或可一出即有表現。「零距離」轉馬房後做好晒先出，有賠率可拖。

第11場 第二班（100-80分）1400米 草地

　　軍旗剛仗騎者發揮亂了方寸才冇Ｐ，但另一方面，初升班兼增程也跑得好，似乎二班冇有怕，今次即換人，再搏心態明顯。「共創未來」如再跑短途，只會繼續出現追唔切鏡頭，練者肯加程，做法實際。

　    「披星戴月」回到中程，咪當冇到。「愛跑得」重跑此程驚爆唔起。「雄心」情況差唔多。「齊歡唱」處境則唔同，目前跑1400米應是最適合不過。「非我莫屬」有班，惜配搭唔似樣。