馮諾嘉手記：柏寶揮軍殺敵

魑魅魍魉

　　今日十一場泥草混合賽，大摩手馬實力幾強，上周日尾兩場賽事取消，受影響嘅「曬冷王」、「騰雲駕霧」同「卓爾非凡」都匆匆報名再戰，擺明車馬，之前提過「曬冷王」同「卓爾非凡」隨時W得，可以做膽，有權贏馬起孖。

高明威威試準

　　精選場次第三場四班1800米，用「高明威威」做膽，最近連仗跑近，試準跑呢程，仲未開齋實好鬥志。配腳先拖連番喺同程入位嘅「好旺財」，薛廐仲未「畢業」，為求盡快上岸實搏。「福到財星」前仗1600米入位走勢唔錯，初跑1800亦可以作配。揀多匹，近仗愈跑愈長嘅「神州八號」，長力已試準，可以一博。

　　第六場四班1400米，馬膽「一言為定」，上場初出跑田草1200米得第七，好似無乜睇頭，但睇真一吓，當日初出就跑黏地兼受阻，最終只係輸兩個半馬位，熱過身今場增程跑1400米，用王牌報名證明練者心中有數，隨時可以開齋。配腳方面，「新領袖」前仗以個幾馬位輕取對手，證明實力稍超第四班，上場倒熱，皆因出閘慢，直路又難以望空，今次柏寶唔放手，一定會打醒十二分精神，拖腳首選。「信賴」近四仗雖然只得一冠，實際輸亦只係距頭馬個幾馬位，馬性忠心，呢程表現更準繩，要拖。「好小子」上兩場都跑第三，上場四班尾入位後冇加分，呢場繼續負輕磅，形勢仍然有利，要兼顧。

　　尾場二班1400米，「軍旗」前仗在港初出即贏，後上走勢甚為吸引，上場跑梗頸四，只因王志偉擺前走，今次強配柏寶兼抽到二檔，相信由佢發揮會更有分寸，隨時可以添食，做膽。「共創未來」在港三戰全部有位置，近兩場只係有啲欠運，但馬有實力，贏馬係遲早嘅事，前仗敗喺「軍旗」蹄下，今場再遇，「共創未來」排十三檔確係有啲蝕底，惟有作配。「雄風」上場轉到何良馬房初出，隨即臝馬開齋，開竅後必再接再厲，配腳要拖。上場初跑呢程即跑第三嘅「齊歡唱」，路程已試準，呢場初戴眼罩上陣，亦可以兼顧。